Kitajski lidar zładziŭ prezidentu Francyi raskošny pryjom padčas aficyjnaha vizitu. Hety fakt analityki razhladajuć jak pryznańnie Piekinam važnaści zachavać narmalnyja adnosiny ź Jeŭrapiejskim sajuzam. Što heta značyć dla našaha rehijona?
Kitajski lidar zładziŭ prezidentu Francyi niezvyčajna ščodry pryjom padčas aficyjnaha vizitu. Hety fakt niekatoryja analityki razhladajuć jak prykmietu namieraŭ Piekina lubym koštam zachavać dobryja adnosiny ź Jeŭrapiejskim sajuzam, biez handlu ź jakim ekanomika Kitaja abvalicca.
Važnaść, jakuju aficyjny Piekin nadaje adnosinam z adnoj z klučavych krain ES, padkreślivaje toj fakt, što Emanuel Makron byŭ zaprošany kitajskim lidaram u Huančžou, stalicu pravincyi Huandun — jakoj u svoj čas kiravaŭ baćka Si Czińpina. Tam jany razam vypili čaju. Takija pajezdki z zamiežnymi lidarami zdarajucca niačasta, źviartaje ŭvahu Reuters. U kitajskaj cyrymanijalnaj tradycyi jany značać šmat.
Reuters spasyłajecca na słovy prafiesara kitajaznaŭstva i zamiežnaj palityki Denvierskaha ŭniviersiteta Čžao Sunšenha ab tym, što
«usie kitajskija zamiežnapalityčnyja dziejańni majuć fonam amierykana-kitajskija adnosiny. Tamu supracoŭnictva ź luboj krainaj, asabliva ź siarednimi abo vialikimi dziaržavami jak Francyja, — heta toje, što jany buduć sprabavać zrabić, kab supraćstajać ZŠA».
Na dumku analityka Rhodium Group Noa Barkina, hałoŭnaja meta Kitaja — kab Jeŭropa zajmała adnosna Kitaja bolš miakkuju pazicyju, čym Złučanyja Štaty.
Hetuju dumku paćviardžaje i redakcyjny artykuł, raźmieščany ŭ čaćvier 6 krasavika ŭ kitajskaj aficyjnaj haziecie «Global Times»:
«Usim jasna, što być stratehičnym vasałam Vašynhtona — heta tupik. Pieratvareńnie adnosin pamiž Kitajem i Francyjaj u most dla supracoŭnictva pamiž Kitajem i Jeŭropaj vyhadnaje abodvum bakam i cełamu śvietu».
Jak viadoma, Emanuel Makron ździejśniŭ svoj vizit razam z kiraŭnicaj Jeŭrapiejskaj kamisii Ursułaj fon der Lajen. Jaje pavitalnaja cyrymonija ŭ aeraporcie była bolš ścipłaj. Jaje nie zaprašali na niekatoryja mierapryjemstvy z udziełam lidaraŭ dźviuch krain, a voś Makron sustrakali pa maksimalnaj prahramie, zusim nie na tym uzroŭni, na jakim niadaŭna prymali Alaksandra Łukašenku.
Makron i fon der Lajen, u pieršuju čarhu, prasili ad Piekina bolš kankretnych dziejańniaŭ va ŭrehulavańni vajny na Ukrainie.
Analityk Noa Barkin adznačaje adnosna hetaha:
«Makron, zdavałasia, vieryŭ, što zmoža pierakanać Si, kab toj źmianiŭ svoj padychod da vajny. Jon pryjechaŭ nie z hołymi rukami — pryvioz z saboj vielizarnuju delehacyju biznes-kołaŭ i paćvierdziŭ svaju padtrymku stratehičnaj aŭtanomii Jeŭropy», — miarkuje analityk.
Adnak ad Kitaja Makronu ŭdałosia dabicca nie tak i šmat. Napiaredadni vizitu pasoł Kitaja pry Jeŭrapiejskim sajuzie zajaviŭ, što Piekin nie padtrymlivaje vajennaj apieracyi Rasii va Ukrainie, a zajavy pra «biezhraničnuju družbu» z Maskvoj nie bolš čym rytoryka. Padčas samoha vizitu Piekin paabiacaŭ padtrymać mirny płan Francyi — kali taki budzie. Ale heta, znoŭ ža, rytoryka. «Pierad Makronam Si Czińpin niepachisny» — taki zahałovak daje analizu vizitu ŭ Piekin dobra infarmavanaje francuzskaje vydańnie Le Monde.
Adnak klučavoje — heta ceny, pa jakich Kitaj kuplaje ŭ Rasii naftu i haz, i pastaŭki mikraschiem dla rasijskaj zbroi. Pakul Kitaj nie parušaŭ stoli cen, ustanoŭlenaj Zachadam, kab abmiežavać zdolnaść Maskvy finansavać vajnu. A značnych pastavak zbroi, bojeprypasaŭ i mikraschiem nie fiksujecca. Heta važniej za słovy.
Padkreślenaja demanstracyja pavahi Kitaja da Makrona ŭpisvajucca ŭ dypłamatyčnuju stratehiju Kitaja, jaki sprabuje asłabić vydatki strymlivańnia Złučanymi Štatami na fonie roznahałośsiaŭ nakont Tajvania, vajny va Ukrainie i abmiežavańniaŭ ZŠA na ekspart technałohij.
U 2023 hodzie dypłamatyčnyja vydatki Kitaja vyraśli na 12,2 pracenta. Tolki za apošnija niekalki tydniaŭ kitajskija lidary i vysokapastaŭlenyja čynoŭniki naviedali Rasiju, Sinhapur, Małajziju, Ispaniju i Japoniju.
U sakaviku Kitaj vystupiŭ pasrednikam u vyrašeńni kanfliktu pamiž Saudaŭskaj Aravijaj i Iranam. Heta dazvoliła Piekinu zajavić ab svajoj roli miratvorca na Blizkim Uschodzie, što adpaviadaje jaho žadańniu hulać bolšuju rolu ŭ śviecie.
U najbližejšyja tydni čakajucca vizity ŭ Piekin kiraŭnika zamiežnapalityčnaj słužby Jeŭrasajuza Žazepa Barela i ministra zamiežnych spraŭ Hiermanii.
U ZŠA da dypłamatyčnaha ŭzajemadziejańnia Kitaja z Francyjaj staviacca z dolaj skieptycyzmu. Pa danych niekatorych krynic, Vašynhton vyčekvaje, kab pabačyć, ci jeŭrapiejskija razmovy ź Piekinam pa Ukrainie vyvieduć na niejkuju kankretyku.
Čytajcie jašče:
Si Czińpin paabiacaŭ Makronu padtrymać francuzski mirny płan pa Ukrainie
Kamientary
Łživaja, łukavaja i ludojedskaja vłasť.