Ułady Ukrainy raspaviali kiraŭniku CRU ab płanach raźmiaścić rakiety la Kryma i pačać z Rasijaj pieramovy
Uiljam Biorns tajemna naviedaŭ Ukrainu, jamu raskryli płany vyzvaleńnia terytoryj.
Padčas tajnaha vizitu va Ukrainu dyrektara CRU Uiljama Biornsa ŭ pačatku hetaha miesiaca ŭkrainskija ŭłady raskryli jamu stratehiju viartańnia akupavanych Rasijaj terytoryj i pačatku pieramovaŭ ab spynieńni ahniu z Maskvoj da kanca hoda.
«Pajezdka Biornsa, pra jakuju raniej nie paviedamlałasia, uklučała sustrečy z prezidentam Uładzimiram Zialenskim i vyšejšym kiraŭnictvam ukrainskaj raźviedki», jak piša «Ukrainskaja praŭda» sa spasyłkaj na Washington Post.
Pavodle źviestak krynic vydańnia, metaj vizitu było paćvierdzić prychilnaść administracyi ZŠA abmienu raźviedvalnymi źviestkami, jakija dapamohuć Ukrainie abaranić siabie.
Publična ŭkrainskija čynoŭniki vykazvali rasčaravańnie z nahody krytyki tempaŭ kontrnastupleńnia, jakija da hetaha času mieli miesca.
Ale, jak śćviardžajuć krynicy, u pryvatnych razmovach vajennyja płaniroŭniki ŭ Kijevie dali Biornsu i inšym upeŭnienaść u tym, što ich meta — advajavać značnuju terytoryju da vosieni; pieramiaścić artyleryju i rakietnyja sistemy da miažy z kantralavanym Rasijaj Krymam; prasunucca dalej na ŭschod Ukrainy, a zatym pačać pieramovy z Maskvoj upieršyniu paśla taho, jak mirnyja pieramovy sarvalisia ŭ sakaviku minułaha hoda.
«Rasija pojdzie na pieramovy tolki tady, kali adčuje pahrozu», — skazaŭ vysokapastaŭleny ŭkrainski čynoŭnik.
CRU admoviłasia dać acenku Biornsam pierśpiektyvam nastupu.
Kamientary