«Rychtavaŭsia da vyjezdu, ale nie paśpieŭ». Byłoha palitviaźnia paŭtorna zatrymali nieŭzabavie paśla vychadu z kałonii

Źbieh, viarnuŭsia, trapiŭ za kraty

Ihar Niemirovič rodam z Bresta, ciapier jamu 31 hod. Pačatak jaho historyi raskazvali pravaabaroncy «Viasny»: mužčynu zatrymali viasnoj 2022 hoda i źmiaścili pad chatni aryšt, adnak jamu ŭdałosia źbiehčy i vyjechać u Polšču.

Vosieńniu 2023 hoda Niemirovič źviarnuŭsia ŭ kamisiju pa viartańni biełarusaŭ, jakija vyjechali z krainy z-za represij, i paźniej viarnuŭsia dadomu. Hety momant kamientavaŭ nabližany da HUBAZiK telehram-kanał: pavodle infarmacyi siłavikoŭ, zajaŭku Ihara nie paśpieli razhledzieć, bo jon «adpraviŭ elektronny list u kamisiju pa viartańni i pajechaŭ u Biełaruś nastupnaj ža nočču».

U vyniku ŭ Biełarusi mužčynu zatrymali i ŭ kancy 2023 hoda prosta ŭ SIZA sudzili za publikacyju ŭ instahramie z tekstam, jaki «ŭ nieprystojnaj formie prynižaje honar i hodnaść Alaksandra Łukašenki». Sudździa pryznała chłopca vinavatym i pryznačyła hod kałonii ahulnaha režymu. Zvarot u kamisiju jana nie paličyła «biezumoŭnaj padstavaj dla vysnovy ab jahonym raskajańni».

Pavodle infarmacyi «Viasny», Ihar Niemirovič adbyvaŭ pakarańnie ŭ kałonii № 17 u Škłovie, u žniŭni 2024 hoda vyzvaliŭsia.

«Rychtavaŭsia da vyjezdu, ale nie paśpieŭ»

Jak stała viadoma «Lusterku», užo vosieńniu taho samaha hoda mužčynu zatrymali paŭtorna. Hetuju infarmacyju žurnalistam paćvierdziŭ čałaviek, jaki pierasiakaŭsia ź Niemirovičam za kratami. U metach biaśpieki niekatoryja detali jaho historyi nie publikajucca, adnak paćviardžajecca fakt jaho źniavoleńnia ŭ minułym.

«Ihar rychtavaŭsia da vyjezdu ź Biełarusi, ale nie paśpieŭ i byŭ zatrymany. Jon skazaŭ, što paśla vychadu z-za krataŭ jamu chtości padkazaŭ, što možna atrymać dapamohu jak byłomu palitviaźniu. Ihar pašukaŭ ab hetym u internecie i abraŭ «Viasnu». Jon mnie skazaŭ, što napisaŭ u «pryvat» da «Viasny». Havorka išła pra Telegram», — paviedamiŭ jon.

Surazmoŭca «Lusterka» dakładna nie viedaje, byŭ heta sapraŭdny bot ci padrobleny. Pavodle jaho, jon nie abmiarkoŭvaŭ hety momant ź Iharam. «Miarkuju, jon i nie praviaraŭ», — vykazaŭ mierkavańnie jon.

Adnak hety momant moža być važny: padroblenyja boty zvarotnaj suviazi jość u mnostva niaŭradavych inicyjatyŭ, u tym liku i ŭ «Viasny». Jak pisałasia raniej, za fejkavym čat-botam płana «Pieramoha» stajali supracoŭniki HUBAZiK, za botam Pałka Kalinoŭskaha — taksama jany.

Pavialičyć

«Jon adpraviŭ u pierapiscy svajo fota, dzie aproč tvaru była daviedka ab vyzvaleńni ź viaźnicy. «Viasna», sa słovaŭ Ihara, raźmieściła hetaje fota u svaim instahram-akaŭncie, što było zaŭvažana siłavikami. Z taho, što ja pamiataju, Ihar sam bačyŭ hetuju publikacyju z tym fota, dzie jon staić z daviedkaju ŭ rukach. Ihar dakładna kazaŭ pra Instagram», — havoryć surazmoŭca.

U pravaabarončym centry «Viasna» padkreślili, što nie publikavali nijakich dakumientaŭ Niemiroviča.

«My nie publikujem asabistuju infarmacyju palitviaźniaŭ, jakaja moža im patencyjna naškodzić», — prakamientavali «Lusterku» pradstaŭniki arhanizacyi. Tam taksama dadali, što ŭ metach biaśpieki nie mohuć paćvierdzić abo abvierhnuć, ci źviartaŭsia da ich toj ci inšy čałaviek.

Pa słovach krynicy «Lusterka», na Niemiroviča zaviali novuju kryminalnuju spravu, u joj fihuravała jakraz taja adpraŭlenaja fatahrafija. Surazmoŭca «Lusterka» nie zapomniŭ artykuł dakładna, adnak vykazaŭ zdahadku, što havorka pra 361-4 KK (sadziejničańnie ekstremisckaj dziejnaści).

Fakt paŭtornaha zatrymańnia Ihara Niemiroviča taksama paćvierdziła pravaabarončaja inicyjatyva Dissident.by sa spasyłkaj na ŭłasnuju krynicu. Pavodle infarmacyi pravaabaroncaŭ, sud pa spravie bieraściejca prajšoŭ u krasaviku 2025 hoda. Pa artykule 361-4 KK mužčynu prysudzili da troch hadoŭ pazbaŭleńnia voli va ŭmovach uzmocnienaha režymu.

• 0
• 0
• 1
• 8
• 0
• 1
• 1
• 0