U abychod sankcyj. «Biełavija» rychtujecca lotać na samalotach Airbus
«Biełavija» rychtuje da palotaŭ try samaloty Airbus A330-200, uviezienyja ŭ Biełaruś u abychod sankcyj. Hetyja samaloty ŭžo atrymali rehistracyjnyja numary EW-587PD, EW-588PD i EW-589PD, raskazała «Biuro» krynica ŭ avijacyjnaj halinie.
Adzin z samalotaŭ, pierafarbavany ŭ kolery «Biełavija», trapiŭ u kadr videasiužetu, źniataha niadaŭna ŭ Nacyjanalnym aeraporcie Minsk. Jaho zaŭvažyła vydańnie Reform.news. Na videa možna razabrać biełaruski rehistracyjny numar — EW-589PD. Samalot staić na parkoŭcy pierad Minskim zavodam hramadzianskaj avijacyi №407. Letaś tam adkryli kompleks pa farbavańni pavietranych sudnaŭ.
Z kanca minułaha hoda biełaruskija bortpravadniki vučacca absłuhoŭvać samaloty, jakija prybyli ŭ Minsk, vyśvietliła «Biuro» ŭ sumiesnym rasśledavańni ź biełaruskaj słužbaj «Radyjo Svaboda». Ściuardesy i ściuardy prachodzili navučańnie ŭ Maskvie. U avijaparku «Biełavija» nikoli nie było samalotaŭ Airbus, a voś rasijski «Aerafłot» užo daŭno ich vykarystoŭvaje. U sacyjalnych sietkach žurnalisty znajšli mnostva fotazdymkaŭ biełaruskich bortpravadnikoŭ, jakija prachodziać padrychtoŭku ŭ navučalna-trenirovačnym kompleksie «Aerafłota». Na adnym ź ich biełaruskaja ściuardesa staić pobač z makietam samalota Airbus A330.
«Heta ja jedu na rejs ź pieršaha spatkańnia, viedajučy, što druhoha nie budzie. Zatoje ciapier jon viedaje, čym Boeing adroźnivajecca ad Airbus», — napisała na svajoj staroncy ŭ sacyjalnych sietkach inšaja ściuardesa, jakaja prachodziła navučańnie ŭ trenirovačnym kompleksie «Aerafłota».
Pavodle słoŭ jašče adnoj krynicy ŭ avijacyjnaj śfiery, «Biełavija» raźličvaje ŭ lepšym vypadku zapuścić tolki dva samaloty ŭ ekspłuatacyju da kanca hetaha hoda. Ciapier pavietranyja sudny pryvodziać da ładu, bo ŭ ich znošany sałon — samalotam bolej za 20 hadoŭ.
«Usio zaciahvajecca jašče i tamu, što «Biełavija» nikoli raniej nie mieła spravy z Airbus. Prosta mieć takija samaloty i padrychtavanyja ekipažy — niedastatkova. Treba padciahnuć adpaviednym čynam i techničny piersanał, ramontnuju bazu, bortpravadnikoŭ. Bo kali zdarycca niejkaja niaspraŭnaść abo navat płanavaje absłuhoŭvańnie — usio «stanie». Da taho ž usio heta adbyvajecca va ŭmovach žorstkich sankcyj. Akramia taho spravu zaciahvaje proćma biurakratyčnych pracedur», — raskazała krynica.
Airbus A330-200 moža pieravozić ad 210 da 406 pasažyraŭ i vykarystoŭvajecca dla palotaŭ na dalokija adlehłaści. Mahčymyja napramki ź Biełarusi: Vjetnam, Tajłand i Kitaj.
Jak samaloty Airbus trapili ŭ Biełaruś?
Sa śniežnia 2021 hoda dziaržaŭnaja avijakampanija «Biełavija» znachodzicca pad sankcyjami ES, a sa žniŭnia 2023 hoda — pad sankcyjami ZŠA. Kab pryhnać u Biełaruś samaloty Airbus, była vykarystanaja schiema abychodu sankcyj z udziełam firmy-prakładki. Naziralniki za samalotami sfatahrafavali pavietranyja sudny, kali jany tolki prybyli ŭ Nacyjanalny aeraport Minsk u žniŭni minułaha hoda.
Na ich vidać nadpis Onur Air i sinija chvasty z palmami. I heta nie vypadkova. Niekatory čas hetyja pavietranyja sudny vykarystoŭvalisia avijakampanijaj Saudi Arabian Airlines, čyje samaloty majuć jakraz taki sinija chvasty z palmami.
U sakaviku 2020 hoda samaloty byli pieradadzienyja tureckaj kampanii Onur Air, jakaja praz dva hady abviaściła pra bankructva. Ź listapada i śniežnia 2023 hoda ŭsie try samaloty naležać hambijskaj kampanii Magic Air. Mienavita hetaja kampanija dastaviła samaloty ŭ Minsk.
Hambija nie padpadaje pad zachodnija avijacyjnyja sankcyi i nie brała na siabie nijakich abaviazkaŭ pa ich vykanańni, tamu źjaŭlajecca zručnaj jurysdykcyjaj dla abychodu abmiežavańniaŭ. Raniej niekatoryja sudny pad ściaham Hambii vykarystoŭvalisia ŭ jakaści cieniavoha fłotu dla ekspartu rasijskaj nafty ŭ abychod sankcyj.
Asnoŭnym uładalnikam hambijskaj kampanii Magic Air źjaŭlajecca iardanski biznesoviec siryjskaha pachodžańnia Tarek Zijad Abdel Chamid al-Adžami.
Raniej jon pryhaniaŭ samaloty Airbus dla siryjskaj avijakampanii Cham Wings. U časy režymu Bašara Asada hetaja avijakampanija vykarystoŭvałasia dla pieravozki siryjskich najomnikaŭ, handlu zbrojaj, narkatrafiku i admyvańnia hrošaj. Akramia taho, Cham Wings padpała pad jeŭrapiejskija sankcyi, bo pieravoziła ŭ Biełaruś mihrantaŭ ź Siryi, jakija sprabavali nielehalna praniknuć u ES.
Darečy, letaś u žniŭni razam z tryma samalotami Airbus A330-200 hambijskaja kampanija Magic Air pryhnała ŭ aeraport Minska i adzin vuzkafiuzielažny samalot Airbus A320-200. Praz paru dzion hety samalot vylecieŭ u Damask. Ciapier jon naležyć usio toj ža siryjskaj kampanii Cham Wings. Pavodle źviestak prajekta Motolko.help, na hetym samalocie ŭ Minsk prylacieŭ kiraŭnik siryjskaha MZS niezadoŭha da źviaržeńnia režymu Bašara Asada.
Ahienctva Reuters, jakoje taksama zajmałasia hetaj temaj, apublikavała kamientar ad upraŭleńnia hramadzianskaj avijacyi Hambii. Pavodle słoŭ čynoŭnikaŭ, try samaloty Airbus A330-200 byli źniatyja z rehistracyi ŭ Hambii praz dva dni paśla prybyćcia ŭ Minsk, tamu što kampanija Magic Air pradała ich kampanii z AAE. Jaje nazva nie paviedamlajecca. U jeŭrapiejskaj karparacyi Airbus paviedamili Reuters, što dakładna vykonvajuć mižnarodnyja sankcyi, ale nie majuć mahčymaści kantralavać prodaž patrymanych samalotaŭ i ŭpłyvać na trecija baki, jakija parušajuć sankcyi.
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary
Imiejem śpisannyj i pokrašiennyj sekond-chend.
Takoj vieś park łukašienok.