Rasijskija infarmacyjnyja ahienctvy paviedamili, jaki źmiest byŭ u miemaranduma, jaki siońnia delehacyja Rasii pieradała ŭkrainskamu boku na pieramovach u Stambule. Nijakaha źmiakčeńnia rasijskich pazicyj nie było, patrabavańni pa-raniejšamu maksimalisckija i nierealistyčnyja, heta faktyčna kapitulacyja Ukrainy.
Miemarandum Rasii, jak paviedamlajecca, uklučaŭ try raździeły z dvuma varyjantami umoŭ spynieńnia ahniu i 31 punkt.
Kreml pa-raniejšamu patrabuje poŭnaha vyviadzieńnia ŭkrainskich vojskaŭ z terytoryi Danieckaj, Łuhanskaj, Chiersonskaj i Zaparožskaj abłaściej na praciahu 30 dzion z momantu spynieńnia ahniu. Hetyja terytoryi, a taksama anieksavany ŭ 2014 hodzie Krym, Rasija patrabuje aficyjna pryznać svaimi terytoryjami z boku mižnarodnaj supolnaści.
Na pieryjad spynieńnia ahniu ŭkrainskim vojskam musić być zabaroniena pieramiaščacca, akramia jak dla adstupleńnia na ŭzhodnienyja pazicyi.
Ukraina, pavodle pažadańniaŭ Maskvy, pavinna stać niejtralnaj dziaržavaj, biez udziełu ŭ vajskovych błokach. Joj zabaraniajecca prymać abo raźmiaščać jadziernuju zbroju na svajoj terytoryi. Pastaŭki zbroi z Zachadu, a taksama pieradača raźvieddanych Ukrainie pavinny być spynienyja.
Pavodle rasijskich prapanoŭ, va Ukrainie musiać adbycca vybary prezidenta i Viarchoŭnaj Rady (nie paźniej za 100 dzion paśla skasavańnia vajennaha stanovišča), paśla čaho pavinna być padpisanaja mirnaja damova. Jana musić być zaćvierdžanaja rezalucyjaj Rady Biaśpieki AAN, jakaja maje jurydyčnuju siłu.
Ukraina pavinna pravieści amnistyju dla źniavolenych prarasijskich dziejačaŭ i vyzvalić pałonnych. Taksama stavicca ŭmova zabieśpiačeńnia «poŭnych pravoŭ i svabod dla ruskamoŭnaha nasielnictva».
Taksama abodva baki pavinny «admovicca ad uzajemnych patrabavańniaŭ pra kampiensacyju škody, naniesienaj u vyniku bajavych dziejańniaŭ», to-bok Ukraina pavinna nie patrabavać ad Rasii reparacyj.
Deputatka, jakaja rychtuje pryhažuń dla Łukašenki, vyjšła zamuž23
Kamientary