Na darevalucyjnych budynkach źbiralisia razabrać avaryjnyja ŭčastki ścien, a ŭ vyniku adzin z fasadaŭ abrynuŭsia całkam.
Pra heta paviedamlaje telehram-kanał Urban Hrodna.
Damy 31 i 33 pa Vialikaj Trajeckaj vulicy, pabudavanyja ŭ kancy XIX — pačatku XX stahodździa, vykupili ŭ 2022 hodzie. Novy ŭłaśnik, hrodzienskaja firma «FrutPak», źbirałasia adkryć u ich restaran sa scenaj dla kancertaŭ, a ŭ padvale — piakarniu.
Pavodle dakumientacyi, raspracavanaj miascovaj budaŭničaj firmaj «ARS Deko», dzie pasadu namieśnicy dyrektara zajmaje byłaja hałoŭnaja architektar Hrodna Volha Barejka, budynki byli ŭ avaryjnym stanie, u ich byccam by praktyčna adsutničali padmurki.
U čas rekanstrukcyi źbiralisia ich abjadnać i adnavić histaryčnaje abličča — detali dekoru, stračanyja ŭ saviecki čas, bałkony, ustanavić draŭlanyja dźviery i vitryny, a taksama viarnuć bramy, jakija viali z dvara na vulicu. Avaryjnyja ŭčastki ścien pavinny byli demantavać i adnavić z zachavańniem habarytaŭ i vonkavaha vyhladu z «rodnaj» kieramičnaj cehły.
Rekanstrukcyja pačałasia ŭ 2025 hodzie, ale ŭžo paśla pačatku razborki ścien damoŭ fasad doma № 31 ranicaj 2 červienia całkam abvaliŭsia. Cehła prabiła aharodžu budoŭli i rassypałasia na prajeznuju častku. U vyniku zdareńnia nichto nie paciarpieŭ.
Heta niaredki vypadak, kali ŭ čas rekanstrukcyi, vypadkova, a mienavita praz adsutnaść narmalnaha ŭmacavańnia nienadziejnych kanstrukcyj, razburajecca bolš, čym praduhledžana pa prajekcie. Hetaja prykraja situacyja robić rekanstrukcyju bolš tannaj i prostaj dla zakazčyka, prajekciroŭščykaŭ i padradčykaŭ.
Taksama źviartaje na siabie ŭvahu toje, što takija harady jak Hrodna i Brest apanavała epidemija avaryjnych histaryčnych budynkaŭ, jakija byccam nie majuć anijakich padmurkaŭ, pakazvajuć znos kanstrukcyj pad 100% i, adpaviedna, źjaŭlajucca avaryjnymi, ale prastajali bolš za stahodździe i nie mieli nijakich źniešnich prykmiet razbureńnia až da taho momantu, jak ich nie pačali «rekanstrujavać», raźbirajučy da padmurkaŭ.
U Hrodnie źnieśli čarhovy dom u histaryčnym centry. Na hramadskim abmierkavańni infarmacyju pra znos utaili ad ludziej
Prajekt, pa jakim źniščyli histaryčnyja kazarmy ŭ Hrodnie, uznaharodzili ŭ naminacyi «architekturnaja spadčyna»
U Łošyckaj siadzibie razabrali budynki brovara, choć abiacali nie čapać
«Bačym, što heta nie zavod, a pałac». U Hrodnie poŭnym chodam idzie rekanstrukcyja budynkaŭ byłoha brovara
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska2
Kamientary