Iłan Mask nazvaŭ hałoŭny zakonaprajekt Trampa «ahidnaj hniusnaściu»
Iłan Mask, syšoŭšy sa svajoj pracy na hramadskich pačatkach u Biełym domie, publična nazvaŭ adnu z hałoŭnych inicyjatyŭ Trampa va ŭnutranaj palitycy, «Adzin Vialiki Cudoŭny Zakon» ab padatkach i asihnavańniach, «ahidnaj hniusnaściu», piša Bi-bi-si.
«Prabačcie, ale ja bolš nie mahu ciarpieć. Hety vielizarny, aburalny, poŭny «śvininy» bil ab vydatkach — heta ahidnaja hniusnaść. Hańba tym, chto hałasavaŭ za jaho: vy viedajecie, što zrabili drenna», — napisaŭ Mask u svajoj sacsietcy X.
«Śvininaj» (pork, pork barrel) u amierykanskaj anhlijskaj movie nazyvajuć biudžetnyja vydatki, prałabiravanyja palitykami ŭ intaresach niejkich vuzkich hrup vybarščykaŭ, biznesoŭcaŭ ci samich palitykaŭ.
Zakonaprajekt, jaki Tramp i Bieły dom nazyvajuć «vialikim cudoŭnym zakonam», u mai byŭ pryniaty Pałataj pradstaŭnikoŭ, a ŭ červieni jaho źbirajecca zaćvierdzić Sienat ZŠA. Iłan Mask u sieryi tvitaŭ napisaŭ, što hety zakon pavialičyć i biez taho hihancki deficyt biudžetu ZŠA da 2,5 tryljona dalaraŭ i ŭzvalić na plečy hramadzian ZŠA niepamierny ciažar vielizarnaha doŭhu. Najbahaciejšy čałaviek płaniety Iłan Mask, jaki vydatkavaŭ na pieradvybarčuju kampaniju Trampa bolš za 250 młn dalaraŭ, nieaficyjna kiravaŭ u Biełym domie novym Departamientam efiektyŭnaści dziaržavy (Doge) i zajmaŭsia skaračeńniem biudžetnych vydatkaŭ.
Mask užo krytykavaŭ «vialiki cudoŭny zakon», ale bolš miakka — jon zajaŭlaŭ, što zakon jaho «zasmuciŭ».
Donald Tramp na novaje vykazvańnie Maska pakul nie adreahavaŭ.
Vydańnie Axios piša sa spasyłkaj na dvuch ananimnych surazmoŭcaŭ, što časta kantaktujuć i z Trampam, i z Maskam, što jany zastajucca siabrami i sajuźnikami, ale Tramp byŭ trochi razdražniony vystupleńniem Maska ŭ sacsietkach.
Surazmoŭcy Axios śćviardžajuć, što nasamreč Maska aburyła praduhledžanaja novym zakonam pastupovaja admiena padatkovych ilhot dla vytvorcaŭ elektramabilaŭ, u tym liku jaho Tesla.
Akramia taho, pa ich źviestkach, Mask, adpracavaŭšy praduhledžanyja pa zakonie 130 dzion daradcam na hramadskich pačatkach, chacieŭ zastacca na pasadzie ŭ Biełym domie, ale aparat Trampa jamu admoviŭ. U vyniku Mask 31 maja syšoŭ — praŭda, Tramp skazaŭ, što Mask «zaŭsiody budzie pobač, pastajanna dapamahajučy nam». Jak piša Axios, Mask chacieŭ, kab hramadzianskaja avijacyja pačała karystacca ŭ navihacyi jaho sistemaj spadarožnikaŭ Starlink. U hetym jamu taksama było admoŭlena.
Apošniaj ža kroplaj, jak kažuć surazmoŭcy vydańnia, dla Maska stała toje, što Tramp raptam adklikaŭ kandydaturu sajuźnika Maska, miljardera Džareda Ajzekmana na pasadu kiraŭnika NASA.
Pa acenkach ekanamistaŭ, «vialiki cudoŭny zakon» Trampa, kali ŭ jaho nie buduć uniesieny praŭki, pavialičyć deficyt biudžetu ZŠA prykładna na 600 młrd dalaraŭ.
U prajekcie praduhledžvajecca, u pryvatnaści, vialiki rost vajskovych vydatkaŭ, vydatki na departacyju nielehalnych imihrantaŭ, i ŭ toj ža čas — pradaŭžeńnie padatkovych pasłableńniaŭ, uviedzienych jašče ŭ pieršy termin Trampa, u 2017 hodzie.
Akramia taho, Bieły dom prapanuje padniać limit dziaržaŭnaha doŭhu ZŠA da čatyroch tryljonaŭ dołaraŭ. «Vialikim cudoŭnym zakonam» niezadavoleny nie tolki Mask, ale i mnohija respublikancy ŭ Kanhresie.
Zaraz prajekt pieradadzieny na razhlad u Sienat. Sienatar-respublikaniec Rend Poł zajaviŭ, što jon nie budzie hałasavać za jaho, kali z dakumienta nie prybiaruć pałažeńnie ab padniaćci stoli dziaržaŭnaha doŭhu.
«Kali Respublikanskaja partyja prahałasuje za hety doŭh, jon budzie na jaje sumleńni», — skazaŭ Poł u efiry telekanała CBS News.
Tramp adkazaŭ šeraham złosnych tvitaŭ, abvinavaciŭšy sienatara Poła ŭ tym, što jon vielmi drenna zrazumieŭ sutnaść prajekta, i što narod jaho štata Kientuki byccam by «ciarpieć jaho nie moža». Lidar respublikanskaj bolšaści ŭ Siencie Džon Tjun skazaŭ žurnalistam, što respublikancy, niahledziačy na roznahałośsi, majuć namier prasoŭvacca z zakonaprajektam «poŭnym chodam», pakolki ŭ im uvasobleny pieradvybarčyja abiacańni prezidenta.
Palityki z Demakratyčnaj partyi ŭchvalili novaje vykazvańnie Maska, jakoha jany žorstka krytykavali za dziejnaść Doge.
«Navat Iłan Mask, udzielnik usiaho hetaha pracesu, adzin z pryjacielaŭ Trampa, zajaviŭ, što hety zakonaprajekt drenny. Možna sabie ŭjavić, nakolki jon nasamreč drenny», — skazaŭ sienatar-demakrat Čak Šumier.
Tramp i kanhresmieny-respublikancy płanujuć pryniać «vialiki cudoŭny zakon» da Dnia niezaležnaści ZŠA 4 lipienia.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary
Tamu navat dziŭna, što časam roznyja papulisty padtrymali Trampa. Chutčej heta była zajzdraść i pavaha za śmiełaje prabićcio dna.
A tak, kali plavuzhać možna roznaje i kali škurnyja intaresy va ŭsich roznyja, značyć, papulisty nie buduć supadać pa pazicyjach adzin z adnym.