U Kałumbii na vačach natoŭpu sprabavali zastrelić patencyjnaha kandydata ŭ prezidenty Mihiela Urybie

Zamach na siabra apazicyjnaj kansiervatyŭnaj partyi «Demakratyčny centr» adbyŭsia padčas pieradvybarčaha mierapryjemstva ŭ hramadskim parku ŭ staličnym rajonie Fantybon, piša Bi-bi-si.

39-hadovy sienatar paśpiachova pieranios apieracyju, paviedamiła jaho žonka Maryja Kłaŭdyja Tarazona.

Palityk byŭ u krytyčnym stanie paśla troch strełaŭ. Pa danych AFP, miedyki skazali, što Urybie atrymaŭ dva ranieńni ŭ hałavu i adno ŭ kalena.

Hienprakuratura Kałumbii paviedamiła, što «niepaŭnahadovy va ŭzroście da 15 hadoŭ byŭ zatrymany z ahniastrelnaj zbrojaj typu pistaleta Glock (9 mm)».

Urybie, jak vidać na apublikavanym videa, atrymaŭ ranieńnie ŭ hałavu, kali vystupaŭ z pramovaj, ludzi ŭ panicy raźbiehlisia. U jaho partyi ŭdakładnili, što va Urybie stralali zzadu.

Urybie chacieŭ stać kandydatam na vybarach prezidenta Kałumbii, jakija projduć u 2026 hodzie.

Prezident Hustava Pietra, jaki pradstaŭlaje levyja siły, zapatrabavaŭ znajści, chto zamoviŭ napad. Partyja «Demakratyčny centr» asudziła napad, nazvaŭšy jaho pahrozaj «demakratyi i svabodzie ŭ Kałumbii». Žonka palityka zaklikała malicca za žyćcio svajho muža.

Prezident Kałumbii «kateharyčna i rašuča» asudziŭ napad jak «akt hvałtu nie tolki suprać jaho asoby, ale i suprać demakratyi». U zajavie havorycca, što roznahałośsi pamiž Pietra i patencyjnym kandydatam u prezidenty «nosiać vyklučna palityčny charaktar».

«Siońnia samaje hałoŭnaje — kab usie kałumbijcy zasiarodzili ŭsiu enierhiju svaich sercaŭ, usiu svaju volu da žyćcia, — zajavili ŭłady, — na tym, kab doktar Mihiel Urybie zastaŭsia žyvy».

Paźniej Pietra zajaviŭ u svaim zvarocie, što zatrymany niepaŭnahadovy i rasśledavańnie budzie zasiarodžana na pošuku zakazčyka napadu. «Na dadzieny momant jość tolki hipotezy», — skazaŭ prezident Kałumbii.

Ministr abarony Pedra Sančes prapanavaŭ uznaharodu sumaj 3 młrd piesa — blizu 730 tysiač dalaraŭ — za infarmacyju ab złačynstvie. Sančes skazaŭ, što naviedaŭ balnicu, dzie znachodzicca Urybie. Pavodle jaho słoŭ, ułady rasśledujuć ci byli inšyja akramia zatrymanaha padletka datyčnyja da zamachu.

Urybie ŭ kastryčniku abviaściŭ ab svaim vyłučeńni na prezidenckich vybarach 2026 hoda. Jon staŭ sienataram u 2022 hodzie.

Sienatar, jaki pakul nie źjaŭlajecca aficyjnym kandydatam u prezidenty ad svajoj partyi, pachodzić ź viadomaj siamji ŭ Kałumbii. Jaho baćka byŭ biznesmenam i prafsajuznym lidaram.

Maci Urybie, žurnalistku Dyjana Turbaj, u 1991 hodzie vykraŭ Medelinski narkakartel, adnym z zasnavalnikaŭ jakoha byŭ Pabła Eskabar. Padčas palicejskaj apieracyi jana zahinuła ad ahniastrelnych ranieńniaŭ.

Jaje baćka Chulia Siezar Turbaj Ajała byŭ prezidentam Kałumbii ŭ 1978-1982 hady.

• 0
• 0
• 0
• 0
• 0
• 0
• 0
• 0