У Калумбіі на вачах натоўпу спрабавалі застрэліць патэнцыйнага кандыдата ў прэзідэнты Мігеля Урыбе
Калумбійскі сенатар Мігель Урыбе Турбай, патэнцыйны кандыдат у прэзідэнты на выбарах у 2026 годзе, змагаецца за жыццё ў бальніцы пасля таго, як у яго стрэлілі падчас перадвыбарчага мерапрыемства ў Багаце ў суботу. У палітыка страляў 15-гадовы падлетак, яго адразу затрымалі.
Замах на сябра апазіцыйнай кансерватыўнай партыі «Дэмакратычны цэнтр» адбыўся падчас перадвыбарчага мерапрыемства ў грамадскім парку ў сталічным раёне Фантыбон, піша Бі-бі-сі.
39-гадовы сенатар паспяхова перанёс аперацыю, паведаміла яго жонка Марыя Клаўдыя Таразона.
Палітык быў у крытычным стане пасля трох стрэлаў. Па даных AFP, медыкі сказалі, што Урыбе атрымаў два раненні ў галаву і адно ў калена.
Генпракуратура Калумбіі паведаміла, што «непаўнагадовы ва ўзросце да 15 гадоў быў затрыманы з агнястрэльнай зброяй тыпу пісталета Glock (9 мм)».
Урыбе, як відаць на апублікаваным відэа, атрымаў раненне ў галаву, калі выступаў з прамовай, людзі ў паніцы разбегліся. У яго партыі ўдакладнілі, што ва Урыбе стралялі ззаду.
Урыбе хацеў стаць кандыдатам на выбарах прэзідэнта Калумбіі, якія пройдуць у 2026 годзе.
Прэзідэнт Густава Петра, які прадстаўляе левыя сілы, запатрабаваў знайсці, хто замовіў напад. Партыя «Дэмакратычны цэнтр» асудзіла напад, назваўшы яго пагрозай «дэмакратыі і свабодзе ў Калумбіі». Жонка палітыка заклікала маліцца за жыццё свайго мужа.
Прэзідэнт Калумбіі «катэгарычна і рашуча» асудзіў напад як «акт гвалту не толькі супраць яго асобы, але і супраць дэмакратыі». У заяве гаворыцца, што рознагалоссі паміж Петра і патэнцыйным кандыдатам у прэзідэнты «носяць выключна палітычны характар».
«Сёння самае галоўнае — каб усе калумбійцы засяродзілі ўсю энергію сваіх сэрцаў, усю сваю волю да жыцця, — заявілі ўлады, — на тым, каб доктар Мігель Урыбе застаўся жывы».
Пазней Петра заявіў у сваім звароце, што затрыманы непаўнагадовы і расследаванне будзе засяроджана на пошуку заказчыка нападу. «На дадзены момант ёсць толькі гіпотэзы», — сказаў прэзідэнт Калумбіі.
Міністр абароны Пэдра Санчэс прапанаваў узнагароду сумай 3 млрд песа — блізу 730 тысяч даляраў — за інфармацыю аб злачынстве. Санчэс сказаў, што наведаў бальніцу, дзе знаходзіцца Урыбе. Паводле яго слоў, улады расследуюць ці былі іншыя акрамя затрыманага падлетка датычныя да замаху.
Урыбе ў кастрычніку абвясціў аб сваім вылучэнні на прэзідэнцкіх выбарах 2026 года. Ён стаў сенатарам у 2022 годзе.
Сенатар, які пакуль не з'яўляецца афіцыйным кандыдатам у прэзідэнты ад сваёй партыі, паходзіць з вядомай сям'і ў Калумбіі. Яго бацька быў бізнэсмэнам і прафсаюзным лідарам.
Маці Урыбе, журналістку Дыяна Турбай, у 1991 годзе выкраў Мэдэлінскі наркакартэль, адным з заснавальнікаў якога быў Пабла Эскабар. Падчас паліцэйскай аперацыі яна загінула ад агнястрэльных раненняў.
Яе бацька Хуліа Сезар Турбай Аяла быў прэзідэнтам Калумбіі ў 1978-1982 гады.
Каментары