Bolš za 1300 čałaviek ličacca źnikłymi bieź viestak u Niepale i Kitai paśla katastrafičnych pavodak
U Niepale źnikłymi ličacca 826 čałaviek, u Kitai — 558.
Vyratavalnyja kamandy šukali sotni źnikłych bieź viestak uzdoŭž miažy Niepała i Kitaja paśla katastrafičnaha i śmiarotnaha patoku vady i brudu, jaki dniom raniej prajšoŭ praź niekalki nasielenych punktaŭ paśla abvału ledavika, piša AP.
Nacyjanalnaje ŭpraŭleńnie pa źnižeńni ryzyki stychijnych biedstvaŭ i kiravańni imi Niepała paviedamiła, što 826 čałaviek ličacca źnikłymi bieź viestak, a kolkaść zahinułych u vyniku raptoŭnych pavodak u krainie ŭ čaćvier vyrasła da 165. Niepalskija ŭłady ŭzmacnili vyratavalnyja raboty ŭ najbolš paciarpiełych rajonach Nuvakot i Rasuva.
Kitajski dziaržaŭny telekanał CCTV asobna paviedamiŭ, što 260 z 558 źnikłych u Tybiecie — zamiežniki, a dvuch miascovych žycharoŭ udałosia vyratavać. Pavodle jaho źviestak, na ranicu čaćviarha zahinuli jak minimum try čałavieki.
Katastrofa ŭ Niepale i Tybiecie nie źjaŭlajecca adzinkavym vypadkam. Račnaja sistema Łchende-Kchoła ŭžo dvojčy vychodziła ź bierahoŭ usiaho za 14 miesiacaŭ, a ŭsio bolš niestabilnaja ledavikovaja sistema Himałajaŭ pahražaje nasielenym punktam, infrastruktury i zapasam vady ŭ adnym z najbolš hustanasielenych rehijonaŭ śvietu.
Kamientary