Siel u Niepale i Tybiecie: kala 1500 čałaviek zahinuli ci źnikli. Bolšaść ź ich — turysty, siarod ich 53 ukraincy

U Niepale niepadalok ad miažy z Kitajem adbyłasia pavodka, vyklikanaja schodam sielavoha patoku.

Pavodle źviestak niepalskich uładaŭ na ranicu čaćviarha, zahinuli nie mienš za 162 čałavieki, a kala 850 čałaviek, u tym liku kala 500 zamiežnikaŭ, ličacca źnikłymi bieź viestak. Heta ŭ Niepale.

Kitajskija ŚMI paviedamili pra bolš čym 550 źnikłych u Tybiecie, ź ich 260 — zamiežniki. Pryčynaj katastrafičnaj pavodki moh stać vielizarny kavałak lodu, jaki ŭpaŭ u hornuju raku, piša Bi-bi-si.

Praz sutki paśla taho, jak na miažy Niepała i Kitaja adbyłasia katastrafičnaja pavodka, palicyja Niepała paviedamiła pra 162 znojdzienyja cieły. Jak zajaviła palicyja ranicaj u čaćvier, 64 cieły byli vyjaŭlenyja ŭ rajonach nižej pa ciačeńni ŭ akruzie Čytvan, jašče 26 — va Uschodnim Navałparasi.

Siarod socień ludziej, miescaznachodžańnie jakich pa-raniejšamu nieviadomaje, — 28 palicejskich. Siel źnios pamiežny pierachod miž Tybietam i Niepałam.

U sieradu ŭdzień, praź niekalki hadzin paśla zdareńnia, niepalskaja palicyja zajaviła, što źnikłymi bieź viestak ličacca 579 turystaŭ, u tym liku 466 zamiežnikaŭ z 28 roznych krain. Siarod źnikłych — bolš za sotniu žycharoŭ Niepała, prykładna stolki ž hramadzian Indyi, 54 hramadzianina ZŠA i 33 brytancy.

U Tybiecie, pavodle źviestak kitajskich dziaržaŭnych ŚMI na ranicu čaćviarha, zahinuli jak minimum try čałavieki, bolš za 550 ličacca źnikłymi bieź viestak. Siarod ich — 260 zamiežnych hramadzian.

Usie jany znachodzilisia ŭ momant pavodki ŭ rajonie pamiežnaha punkta ŭ Hjirunhu. Heta asnoŭny punkt pierasiačeńnia miažy dla turystaŭ i transpartnych znosin pamiž Kitajem i Niepałam.

Uviečary Ministerstva zamiežnych spraŭ Ukrainy paviedamiła, što ŭ Niepale źnikli bieź viestak jak minimum 53 ukrainskija turysty.

«U MZS pastupiła paviedamleńnie pra źniknieńnie siońnia ranicaj hrupy turystaŭ z 46 hramadzian Ukrainy ŭ zonie stychijnaha biedstva, — paviedamiła źniešniepalityčnaje viedamstva Ukrainskaj słužbie Bi-bi-si. — Usiaho, pavodle infarmacyi Turysckaj palicyi Niepała, na hety momant u vyniku biedstva źnikłymi bieź viestak ličacca 53 hramadzianina Ukrainy».

Pry hetym u MZS adznačyli, što ŭ viedamstva niama infarmacyi pra znachodžańnie ŭkraincaŭ u śpisie zahinułych abo paciarpiełych.

Čamu tam akazałasia tak šmat turystaŭ

Rajon, dzie adbyłosia stychijnaje biedstva, pavodle Asacyjacyi turapierataraŭ Rasii, nie vielmi papularny dla arhanizavanych turaŭ. Adnak u hety čas hoda ŭ Niepale asabliva šmat pałomnikaŭ-budystaŭ i induistaŭ.

U rajonie katastrofy znachodziacca dva miescy pałomnictva, jakija šanujuć i induisty, i budysty, i džajny. Heta voziera Mansarovar kala hary Kajłaš u Tybiecie, na kitajskim baku, i voziera Hosajkunda ŭ Niepale, u rajonie Rasuva.

Kožny hod da voziera Mansaravar praź Niepał jeduć i iduć dziasiatki tysiač turystaŭ.

Pryčym naviedvać voziera Mansarovar, a taksama kupacca ŭ voziery Hosajkunda pryniata pieradusim mienavita ŭ hety čas.

Piešy maršrut da hary Kajłaš vielmi papularny mienavita ciapier, padčas poŭni, jakaja ličycca dobrym znakam.

• 0
• 0
• 0
• 1
• 2
• 10
• 0
• 0