Вялікдзень — найважнейшае свята для ўсіх хрысціян, і для католікаў, і для праваслаўных, і для пратэстантаў. Гэта свята жыцця, веры і надзеі, сугучных абуджэнню і росквіту прыроды. А таксама гэта час заканчэння Вялікага посту, таму важная частка падрыхтоўкі да свята — гатаванне асаблівых страў. Сабралі для вас кулінарныя традыцыі свята ў адным артыкуле.
Чырвонае яйка — сімвал Вялікадня
Згодна з біблейскай гісторыяй, калі Марыя Магдаліна падавала яйка рымскаму імператару Тыберыю як сімвал увакрэсення Хрыста, імператар з сумневам адказаў, што як яйка белае, а не чырвонае, так і мёртвыя не ўваскрасаюць. У тое ж імгненне яйка ў яго руцэ пачырванела.
Таму чырвонае яйка — галоўны сімвал свята, хоць ужо даўно яйкі фарбуюць і ў іншыя колеры: так, з дапамогай куркумы можна зрабіць іх ярка-жоўтымі, з дапамогай куркумы, шафрану і чырвонай капусты — зялёнымі. Мы падрабязна расказвалі, як можна пафарбаваць яйкі ў розныя колеры натуральнымі і харчовымі фарбавальнікамі, а таксама зрабіць арыгінальны ўзор, — фарбаваць з малюнкам па трафарэце або з аптэчнымі гумкамі.
Пірог, або паска
Велікодная паска. Фота: рixabay
Палякі называюць яе «бабка», у паўночнарасійскіх гаворках бытавала слова «куліч», а ў Беларусі, як і ва Украіне і на поўдні Расіі — «паска».
Свята Пасха было і ахвяраваннем, таму словам гэтым пачалі называць рытуальныя хлябы.
Прапануем чатыры рэцэпты тварожнай пасхі, з якіх кожны выбера сабе штосьці, што прыйдзецца яму даспадобы. Ёсць і арыгінальная прапанова — нямецкі пасхальны хлеб остэрброт — цікавая альтэрнатыва звыклым пірагам.
Мясныя стравы
Заканчэнне посту азначае, што можна нарэшце дазволіць сабе мясныя стравы. Таму звычайна на велікодным стале бывала запечанае мяса.
Вашай увазе — рэцэпты традыцыйных беларускіх страў на Вялікдзень, напрыклад, свініна ў цесце і свініна, запечаная з бульбай. Сярод арыгінальных варыянтаў мясных страў — запечаны кумпяк ці лапатка або запечаная нага ягняці з прыправамі — прыгатаваць яе нескладана, а смак таго варты.
Галоўная велікодная прыправа да мясной ежы — надраныя на дробную тарку карані хрэну, змешаныя з сырым цёртым бураком.
Упрыгожанне велікоднага стала
Упрыгожанне велікоднага стала. Фота: рixabay
Вялікдзень — традыцыйнае свята, таму натуральным яго аздабленнем могуць быць ручнікі і абрусы з нацыянальнай сімволікай.
Перадаць веснавую і светлую атмасферу свята можна і з дапамогай такіх колераў у абрусах і сурвэтках, як светла-блакітны, светла-зялёны, светла-жоўты і светла-ружовы.
Стол «ажыве», калі дадаць да яго такія прыродныя элементы, як кветкі і травінкі, або змайстраваць дэкаратыўныя гнёзды для яек (іх таксама можна зрабіць з прыродных матэрыялаў, напрыклад, з моху і сухой травы).
Чытайце яшчэ:
Беларускія велікодныя традыцыі
Не толькі пра яйкі. Велікодны ТЭСТ
Чаму католікі і праваслаўныя святкуюць Вялікдзень у розны час. І розніца можа складаць нават месяц?
Цяпер чытаюць
Ваяр з Беларускага добраахвотніцкага корпуса: Я жыў у ружовай бурбалцы2
Каментары
ну якое яшчэ традыцыйнае? у беларусаў што - сваіх свят няма?