Гадзіннічак цікае не толькі для жанчын, бо і ў мужчын бывае падобны да клімаксу працэс. Праўда, называюць яго па-іншаму — андрапаўза. Расказваем, што гэта такое, чым гэта не з’яўляецца і што ўвогуле трэба ведаць пра андрапаўзу.
Андрапаўзу вызначаюць як сіндром, звязаны са зніжэннем сэксуальнага задавальнення або спадам у агульным стане, звязаны з нізкім узроўнем тэстастэрону.
Гэтую з’яву часам называюць мужчынскай менапаўзай, што выклікае незадавальненне дактароў. Рэч у тым, што механізм зменаў падчас менапаўзы і андрапаўзы не супадае. Менапаўзу звязваюць з рэзкім падзеннем узроўню гармонаў эстраген і прагестэрон, і калі б андрапаўза была аналагічнай з’явай, можна было б чакаць рэзкага зніжэння ўзроўню тэстастэрону ў мужчын.
Але гэта не так. Па меры павелічэння ўзросту колькасць тэстастэрону ў мужчыны насамрэч падае, аднак адбываецца гэта павольна — ва ўзросце ад 30 да 40 гадоў хуткасць падзення складае 1% на год. То-бок здаровы мужчына можа вырабляць сперму і ва ўзросце за 80 гадоў.
У той жа час, пэўныя з'явы могуць паспрыяць больш хуткаму падзенню мужчынскага гармону. Гаворка пра атлушчэнне, сур'ёзны стрэс і прыём пэўных лекаў. У выпадках, калі стан мужчыны не звязаны з яго ладам жыцця або псіхалагічнымі праблемамі, гаворка можа ісці пра позні гіпаганадызм — сітуацыю, калі яечкі вырабляюць мала гармонаў ці зусім іх не вырабляюць.
Акрамя гэтага, выпрацоўку тэстастэрону пагаршаюць пэўныя хваробы, у тым ліку:
- інсульт
- інфаркт міякарду
- язвавы каліт
- некантраляваны дыябет
- пашкоджанні і хваробы яечак
- пэўныя генетычныя хваробы (асабліва сіндром Клайнфельтэра)
- ВІЧ
- некаторыя аўтаімунныя хваробы
Што б ні выклікала андрапаўзу, яе характарызуюць адны і тыя ж сімптомы:
- зніжэнне сэксуальнага жадання
- праблемы з эрэкцыяй
- недахоп энергіі
- дэпрэсія
- раздражняльнасць і перапады настрою
- страта моцы або мускульнай масы
- страта росту
- дыскамфорт у грудзях ці іх апуханне
- павелічэнне колькасці тлушчу ў арганізме
- адчуванне жару ці патлівасць
- зніжэнне шчыльнасці костак
- гінекамастыя (павелічэнне грудных залозаў)
- праблемы з канцэнтрацыяй
- бяссонніца
Андрапаўзу звязваюць з павышанай рызыкай сардэчна-сасудзістых хваробаў і астэапарозу, а таксама з магчымай бясплоднасцю.
Самае частае лячэнне сімптомаў андрапаўзы — гэта палепшыць свой лад жыцця. У прыватнасці, дактары прапануюць перайсці на больш здаровае харчаванне, мець рэгулярную фізічную актыўнасць і дастаткова сну, а таксама знізіць колькасць стрэсу ў жыцці. У выпадку з дэпрэсіяй мужчыне могуць прапісаць антыдэпрэсанты або псіхатэрапію. Таксама варта адмовіцца ад курэння і знізіць ўжыванне алкаголю.
Іншы варыянт лячэння — гарманальная тэрапія, і яна сапраўды дапамагае. Навукоўцы адзначаюць, што такая тэрапія дапамагала мужчынам у андрапаўзе панізіць колькасць тлушчу ў арганізме, павялічыць шчыльнасць костак і мускульную моц, палепшыць агульную задаволенасць жыццём і палавую функцыю, а таксама кагнітыўныя магчымасці.
Але пры гэтым некаторыя даследаванні сведчаць, што гарманальная тэрапія тэстастэронам трохі павышае ўзровень прастатычнага спецыфічнага антыгену — павышаны ПСА сведчыць пра няправільную працу прастаты і можа быць маркерам раку залозы. Таму існуе меркаванне, што перад пачаткам тэрапіі лепш прайсці скрынінг на гэты від раку.
«Наша Нiва» — бастыён беларушчыны
ПАДТРЫМАЦЬСтоячы ці седзячы? Як лепш для мужчынскага здароўя мачыцца — тлумачыць уролаг
Былы памочнік Лукашэнкі Ігар Брыло прызнаў, што набраў хабараў на $2 мільёны10
Каментары