Вячорка пракаментаваў словы Яшына пра тое, што Лукашэнка мяняе палітвязняў на дэталі для самалётаў
Падчас нядаўняга выступлення ў Вільні расійскі апазіцыянер Ілля Яшын закрануў тэму беларускіх палітвязняў. «Як мне патлумачылі, ён літаральна абменьвае людзей на дэталі для самалётаў. У яго праблема з «Белавія», і яму трэба рамантаваць самалёт, яму патрэбныя нейкія дэталі, якія ён не можа атрымаць праз санкцыі», — сказаў ён. Франак Вячорка пракаментаваў «Нашай Ніве» гэту заяву.
«Я думаю, Яшын выказаўся фігуральна. Маўляў, Лукашэнка быў бы гатовы абмяняць палітвязняў на зняцце санкцыяў. Канечне, абмен на дэталі для самалёта гучыць дзіўна і адарвана ад рэальнасці. Але гэта не значыць, што нам не трэба спрабаваць розныя спосабы для вызвалення палітвязняў», — адказаў дарадца Святланы Ціханоўскай.
Нагадаем, за некалькі хваляў памілаванняў на свабоду выйшла 115 палітвязняў.
Што стала прычынай, дакладна невядома. Прапаганда выстаўляе гэта жэстам гуманізму Лукашэнкі — але пры гэтым Віктар Бабарыка, Марыя Калеснікава, Сяргей Ціханоўскі, Мікола Статкевіч і некаторыя іншыя палітвязні больш за год знаходзяцца ў рэжыме інкамунікада.
Ёсць версія, што на рэжым націснуў Кітай, каб той нармалізаваў адносіны з Польшчай — і каб не вызваляць толькі Анджэя Пачобута (а гэтага патрабуе Польшча), Лукашэнка вырашыў адпусціць і нейкую колькасць палітвязняў. Іншае меркаванне — што перад выбарамі рашылі крыху разрадзіць атмасферу напружання ў грамадстве. Яшчэ адно — што запусціць працэс вызвалення вязняў прымусілі санкцыі і гэтым пасылаюцца сігналы Захаду.
Цяпер чытаюць
Кадэбэшнікі тэлефануюць беларусам у эміграцыі праз іх сяброў — чаго хочуць?10
Каментары