У вёсках могуць з'явіцца крамы-канструктары. Вось як яны выглядаюць
Здаецца, «Еўрагандаль» знайшоў спосаб адкрываць крамы ў вёсках літаральна за лічаныя дні. Рэалізуецца гэта з дапамогай модульнага павільёна, які вырабляюць на заводзе, прывозяць на месца і збіраюць як канструктар. На прэзентацыі журналістам паказалі пілотны варыянт такой крамы, піша Onliner.by.
Павільён вырабляюць у Мінскім рэгіёне, а сам яго выраб займае каля месяца. На месцы яго збіраюць з модуляў — мантаж доўжыцца прыкладна суткі, яшчэ некалькі дзён сыходзіць на падключэнне электрычнасці і камунікацый.
Фундамент не патрабуецца — канструкцыю можна паставіць на асфальт, пясчаную пляцоўку або грунт. Пры неабходнасці павільён можна дэмантаваць і перавезці ў іншае месца.
Агульная плошча павільёна — 50,9 квадратнага метра. З іх 36,2 «квадрата» займае гандлёвая зала, астатняе — падсобныя памяшканні.
Новы фармат, па сутнасці, павінен замяніць аўталаўку там, дзе попыт стаў пастаянным. Пры неабходнасці павільён можна дэмантаваць і перавезці ў іншае месца.
Таксама падчас прэзентацыі паказалі аўталаўку.
Па словах прадстаўнікоў сеткі, у вёсках часта просяць цукар і дрожджы, заказваюць ліверную каўбасу для катоў. А жанчыны, якія пераехалі за горад «на лецішча», аб'ядноўваюцца і робяць калектыўныя заказы — напрыклад, на морапрадукты.
Па стане на канец 2025 года «Еўрагандаль» кіраваў 1153 крамамі па ўсёй краіне, а ў сельскай мясцовасці працуюць 222 крамы і 52 аўталаўкі.
Каментары