На таргі выставілі санаторый «Рэчанька», які знаходзіцца ў Дзятлаўскім раёне, заўважыў Realt.by. Цана не вельмі высокая.
Ад Мінска да гэтых месцаў каля 220 км, побач цячэ рака Шчара і знаходзіцца ландшафтны заказнік «Ліпічанская пушча». Паводле водгукаў у сеціве, месцы там вельмі прыгожыя, ёсць цудоўныя маршруты для байдарачнікаў.
Двухпавярховы цагляны будынак санаторыя быў пабудаваны ў канцы 1960-х гадоў проста ў лесе. У савецкія гады ён быў даволі папулярным месцам адпачынку. Напрыклад, тут любіў праводзіць вольны час вядомы паэт Пятрусь Броўка. У «Рэчаньцы» нават працавала ўласная гразелячэбніца.
Аднак жа, калі часы памяняліся, санаторый закрылі, ягоныя будынкі моцна струхлелі, а асфальтаваная дарога да дома адпачынку зарасла мохам.
Агульная плошча пабудоў санаторыя налічвае каля 1500 «квадратаў», фізічны знос будынкаў складае 46-48%. Акрамя карпусоў санаторыя, у арэнду здаецца таксама зямельны ўчастак памерам 5 гектараў.
Таргі за былы санаторый пачнуцца з 54 тысяч рублёў (прыкладна 17 тыс. даляраў). Крок аўкцыёну складзе 2,7 тысячы рублёў. Заяўкі прымаюцца да 28 сакавіка, а сам аўкцыён пройдзе 31 сакавіка ў 11:00 на электроннай пляцоўцы ЗАТ «Белрэалізацыя».
Ранейшыя спробы прадаць былы дом адпачынку «Рэчанька» скончыліся безвынікова.
Цяпер чытаюць
«Гэтая партыя прайграная». Беларускія даследчыкі — пра тое, у што ператварылася Акадэмія навук4
«Гэтая партыя прайграная». Беларускія даследчыкі — пра тое, у што ператварылася Акадэмія навук
«Я сказаў на відэа, што мяне не катуюць — на той момант гэта было праўдай. А праз дзве гадзіны мяне збілі». Украінскі журналіст два гады правёў у расійскім палоне — вось што ён перажыў11
Каментары