Лідар магілёўскіх фанатаў пасля сутак збіраўся ва Украіну па свабоду, а цяпер ён за Лукашэнку, ГУБАЗіК і Расію
Неверагодная гісторыя жыцця стваральніка фанацкай суполкі «Сям'я» з Магілёва Мікіты Варажбітава. Хлопец пачынаў з боек у лесе, а цяпер стаў папулярным трэш-блогерам. У канцы 2024 года яго дэпартавалі з Расіі як «пагрозу абараназдольнасці і грамадскаму парадку».
Варажбітаў нарадзіўся 13 снежня 1993 года ў Магілёве. У адным з відэа расказваў, што мама ўсё жыццё працавала настаўніцай. Сам хлопец вялікіх здольнасцяў у школе не праяўляў. Скончыў 9 класаў, а потым паступіў у Ліцэй (раней такія ўстановы называлі ПТВ) на электрыка, распавядае Tribuna.
«Я нават працаваў па спецыяльнасці, але дзе плюс, а дзе мінус, не ведаю. Таму і не затрымаўся доўга», — казаў ён.
Меў «каляфутбол галаўнога мозгу»
Мікіта прыгадваў, што ўпершыню ўбачыў фанацкія бойкі на відэа Укантакце. З таго часу ён гарэў ідэяй стаць адным з хуліганаў. Хлопец запісаўся ў секцыю тайскага бокса і разам з прыяцелямі ладзіў па дварах баксёрскія спаборніцтвы.
«Я жыў каляфутболам, толькі гэтым і цікавіўся. Прыходзіў дадому са школы і чытаў усю даступную літаратуру, глядзеў усе забівы (так фанаты называюць дамоўныя бойкі па акрэсленых правілах — Tribuna). Я ведаў усё пра расійскія і ўкраінскія дзвіжы. Гэта быў каляфутбол галаўнога мозгу, я быў памешаны на ўсім гэтым».
У інтэрв'ю для канала Эдуарда Германскага (баец ММА і футбольны хуліган з Расіі) ён успамінаў, што адзін з такіх трэнінгаў убачылі хлопцы з фанацкай суполкі магілёўскага «Дняпра» Fighters Firm і запрасілі да сябе на сектар. Варажбітаву там не спадабалася, бо было мала боек — з дзве на год. У 2011 годзе ён стварае сваю ўласную фірму, якая атрымала назву «Сям'я».
«Я паклікаў брата. Найлепшы сябар паклікаў сваіх братоў. Мы падумалі, хто мы такія, калі не сям'я?» — тлумачыў Варажбітаў нэймінг. Па яго словах, на піку ў складзе «Сям'і» было каля 80 чалавек, а забівы адбываліся не толькі з беларускімі хуліганамі, але з расіянамі і ўкраінцамі.
«Ён здаў увесь свой калектыў»
З каляфутбольнага руху Варажбітаў ведае Андрэя Трацэўскага з пазыўным «Бяссмертны», які з 2022 года ваюе на баку Украіны.
«Бяссмертнага» някепска ведаў. У 2014—15 гадах мы з ім шмат камунікавалі, ён быў лідарам дынамаўскага калектыву «Першы шэраг». Мы пастаянна рабілі з імі тэмы. «Янкі» (Ігар Янкоў, яшчэ адзін беларускі добраахвотнік ва Украіне — Tribuna) быў у моладзі «Першага шэрагу» і, адпаведна, хутчэй за ўсё, супраць нас біўся», — успамінаў Мікіта ў адным з тыктокаў.
Сам «Бяссмертны» ў сваім тэлеграм-канале не прайшоў міма асобы магілёўскага хулігана. Сцвярджае, што той здрадзіў «сваім сябрам, сваім пацанам»: «Ён здаў увесь свой калектыў каляфутбольны, якіх пасадзілі ў турму. Потым ён збег у Расію, пачаў тусавацца з фанатамі «Лакаматыва». Потым стаў цалавацца ў дзясны з «мясам» (маюцца на ўвазе фанаты «Спартака» — Tribuna). У выніку ўсіх кінуў і стаў крычаць «Лукашэнка — прыгажун». Я рады, што ў свой час разваліў іх калектыў. Я скарыстаўся, што ў Мікіты Варажбітава ўсяго адна звіліна, а мозг як у рыбкі».
Што за гісторыю мае на ўвазе «Бяссмертны»?
Летам 2015 года ГУБАЗіК затрымаў пецярых удзельнікаў «Сям'і», сярод якіх быў і Варажбітаў. Гэтую гісторыю актыўна раскручвалі на дзяржаўных тэлеканалах, захаваўся сюжэт з праграмы «Зона Х». Хлопцы былі арыштаваныя за бойку ў снежні 2014 года ў Рагачове. Тады Варажбітаў пазбег турэмнага зняволення, у той жа год ён заявіў пра роспуск «Сям'і».
Менавіта тая гісторыя і спарадзіла мноства чутак. Tribuna пагутарыла ананімна з двума магілёўскімі фанатамі, яны кажуць, што не маюць пацвярджэнняў, што Варажбітаў кагосьці «здаваў», але падобныя размовы сапраўды вяліся ў сектары.
Былы лідар групоўкі тлумачыў, што з 2014 міліцыя ў Беларусі стала распрацоўваць футбольных фанатаў, якія былі адной з галоўных сілаў падчас рэвалюцыйных падзей ва Украіне.
«У нас у дзяржаве таксама забаяліся, што мы можам зрабіць пераварот. Адчулі, што будзе небяспека, і сталі нас распрацоўваць», — магілёвец.
З фанацкіх часоў Варажбітаў ведаў і Данілу Ляшука з пазыўным «Маджахед», які загінуў у красавіку 2023 года на бахмуцкім кірунку, ваюючы на баку Украіны. «Перасякаўся з ім на бойках, ён прадстаўляў «Дынама» Брэст, калектыў No Comments. <…> А што здарылася ва Украіне, вы ведаеце», — расказваў Варажбітаў у тыктоку.
Ладзіў бойкі АМАП супраць бадзяг
Пасля сканчэння каляфутбольнай старонкі Мікіта стаў развівацца ў блогінгу. Шмат у чым ён капіяваў падыход Максіма «Цесака» Марцінкевіча, расійскага неафашыста. Варажбітаў, як і «Цясак», запісваў на відэа, як ён змагаецца з педафіламі, прастытуткамі, мігрантамі. Гэта пачало прыносіць першы поспех і прагляды.
Другім кірункам сталі адзінаборствы. Варажбітаў выступаў сам у якасці байца ММА, а таксама стаў прамоўціць правядзенне турніраў. Адным з галоўных яго праектаў былі кулачныя баі ў фармаце 2 на 2, якія называліся «АМАП супраць бадзяг».
Баі ладзіліся ў Беларусі і Расіі. Па словах арганізатара, за каманду АМАПа выступалі хлопцы з досведам службы ў спецназе і дэсанце. Сам Варажбітаў на той час ужо пераехаў жыць у Санкт-Пецярбург, дзе пазнаёміўся з неанацыстам Вячаславам Дацыкам. Разам яны працягвалі здзяйсняць рэйды супраць мігрантаў і закладчыкаў.
Дацык у свой час быў вядомы як ММА баец, менавіта ён нанёс адну з самых прыніжальных параз беларускаму спартсмену Андрэю Арлоўскаму. У Расіі Дацык адбываў пакаранне ў турме за незаконнае нашэнне зброі.
«Хацелі з мяне зрабіць палітвязня»
Напярэдадні Новага 2021 года Варажбітаў прыязджае да бацькоў у Магілёў. На радзіме ён захварэў на каранавірус і нават трапіў у лякарню. Пасля выпіскі яго пакінулі на самаізаляцыі. 29 снежня 2020 года яго затрымалі.
«Ззаду ўдар у спіну, паварочваюся — натоўп людзей у масках, б'юць нагамі. У мяне было разуменне, што гэта супрацоўнікі. Дзякуй Богу, што я не стаў супраціўляцца. Мяне скруцілі, кінулі як сабаку ў мікрааўтобус. Крычалі, абражалі, мацюкалі», — успамінаў ён момант арышту.
Варажбітава спачатку адвезлі ў Ленінскі РУУС, а потым кінулі ў ІЧУ. На наступны дзень яго судзяць па скайпе за парушэнне ўмоваў самаізаляцыі і прыгаворваюць да 15 сутак арышту.
«Са мной сядзелі збольшага бамжы і алкашы», — успамінаў ён.
У выніку хлопца судзілі пяць разоў: тройчы за парушэнне ўмоваў самаізаляцыі, яшчэ два разы за выяву свастыкі ў відэа на ютуб-канале і тэлеграме. У адным з інтэрв'ю Варажбітаў кажа, што адсядзеў агулам 49 сутак, у іншым — 52. У любым разе на волю ён выйшаў толькі ў другой палове лютага 2021 года.
Магілёвец успамінаў, што за судамі тады пільна сачылі праваабаронцы: «Яны хацелі зрабіць з мяне палітвязня. Маме казалі, калі [сын] выйдзе, то можа бясплатна з'ехаць у Літву, Латвію ці Польшчу.
Мне здаецца, калі б я быў палітвязнем, то ўвогуле б не выйшаў. Я нічога супраць улады не меў. Яны думалі, што я нейкі жорсткі апазіцыянер».
Варажбітаў згадваў, што ў ІЧУ да яго прыходзілі паштоўкі на беларускай мове. Хлопец адмаўляе, што ўдзельнічаў у пратэстах 2020 года ў Беларусі, але ў розных тэлеграм-каналах гуляе фота Мікіты падчас аднаго з мітынгаў.
«Разумеў, чаму людзі ўскрываюць сябе ў турме»
У ІЧУ Варажбітава не білі. Быў нават матрац, але ляжаць на ім дазвалялі толькі ўначы.
«Дзесьці на 18-я суткі ў мяне паехала кукуха, калі ўначы мяне сталі есці клапы. Я думаў, што гэта за дзікунства, што за канцлагер. У адну ноч мне здавалася, што я памру. Я тады не ведаў, што такое панічная атака. Потым другі раз, трэці гэта паўтарылася. У мяне слёзы, істэрыка, я б'ю ў сценку кулакамі. Я думаў, што мяне забяруць у бальнічку ці псіхушку, каб хоць паветрам падыхаць.
Я разумеў, чаму людзі сябе ўскрываць у турме, вешаюцца», — казаў магілёвец у інтэрв'ю каналу KOVALENKO. Гэты ютуб вядзе ўраджэнец Астраханской вобласці Расіі Святаслаў Каваленка, ён таксама баец MMA — у свой час быў асуджаны да 5 гадоў калоніі за збыт наркотыкаў.
Каля 15 сутак Варажбітаў правёў на супакаяльных таблетках. «Мяне там падплавіла псіхалагічна», — прызнаваўся хуліган.
Пазней казаў, што разам з ім палітвязняў не сядзела, але нібыта чуў гісторыі пра такіх зняволеных ад суседзяў па камерах. Падчас зняволення «сілавікі» выдалілі канал Варажбітава на ютубе, а таксама акаўнты ў іншых сацыяльных сетках.
«Паеду ў Кіеў, там свабода»
Па вызваленні хулігану далі зразумець, што ў Беларусь больш прыязджаць не варта.
«Я баюся, баюся кожны дзень. У Беларусь калі і буду прыязджаць, то без сімкі і з тэлефонам на авіярэжыме.
Я думаю, што паеду ў Кіеў. Там свабода. Там можна дзяўбці барыг, закладчыкаў, педафілаў. Кажуць, там даюць на гэта зялёнае святло», — так Варажбітаў разважаў пры канцы 2021 года.
Праз некалькі месяцаў Расія нападзе на Украіну і пачне поўнамаштабную вайну.
У сваіх сацсетках магілёвец цалкам падтрымлівае Расію, арганізоўваў зборы сродкаў на расійскую армію. Украінцаў часцей за ўсё называе «хахламі».
«Я не хачу ў Еўропу, мае блізкія таксама не хочуць. Я не хачу нічога супольнага мець з Еўропай. У Расіі ўсё цудоўна, перспектывы грамадныя, грошай шмат, бізнес адкрывай колькі хочаш. Афігенная краіна», — казаў ён у сацыяльных сетках.
За гэты час каналы Варажбітава зрабілі імклівы рывок у развіцці. На яго Youtube на сёння амаль 1 мільён падпісчыкаў, а ў тэлеграме — 250 тысяч. У сакавіку 2023 года магілёвец трапіў у спіс стрымераў, якія займаюцца нелегальнай рэкламай казіно. Гэты спіс апублікавала кіраўніца пракрамлёўскай «Лігі бяспечнага інтэрнэту» Кацярына Мізуліна.
Цяпер стаў фанатам ГУБАЗіКа
У снежні 2024 года Варажбітаў быў дэпартаваны з Расіі. Ён змясціў допіс, што быў прызнаны пагрозай «абараназдольнасці і грамадскаму парадку ў Расіі», але праз нейкі час выдаліў паведамленне.
Так хлопец зноў апынуўся ў Беларусі.
«Дэпартавалі, бо мы сталі займацца антыпрапагандай наркотыкаў. Расказваць, што гэта такое. Аберагаць моладзь сталі. Зрабілі шмат, відаць, камусьці мы перайшлі дарогу», — тлумачыў ён забарону на знаходжанне ў Расіі.
За дзень да імітацыі прэзідэнцкіх выбараў 2025 года ў Беларусі Варажбітаў зрабіў вялікі допіс, чаму ён пойдзе галасаваць за Лукашэнку.
«Я лічу Лукашэнку найлепшым прэзідэнтам. У нас няма мігрантаў, а калі з'явяцца і пачнуць весці сябе ганарыста, то іх адразу прызямляць. Вакол адны славяне, адзін да аднаго ёсць павага. У Беларусі няма бандытызму, арганізаванай злачыннасці. Сілавікі працуюць на ўсе 100%», — заявіў Варажбітаў, якога за пару гадоў да таго без дай прычыны збілі пры затрыманні.
Гэты допіс ён аздобіў здымкам у майцы з рунай Одал, якую падчас Другой сусветнай вайны выкарыстоўвалі нацысты.
У чэрвені 2023 года ў мужчыны нарадзіўся сын, якога назвалі Дабрыняй. Варажбітаў задаволены, што ў дзіця поўнае супадзенне імя з рускім багатыром «Дабрыням Нікіцічам». Гэтай вясной магілёвец віншаваў у сваіх сацсетках ГУБАЗіК з іх прафесійным святам:
«ГУБАЗіК — гэта беларусы, якія заўсёды абараняюць сваю радзіму, сапраўдныя патрыёты.<…> Асобна хачу вылучыць хлопцаў з 11-га ўпраўлення (магілёўскае абласное — Tribuna). Дзякуй вам за бяспеку, за чысціню. Ніхто апроч вас. Працуйце, браты!»
Адметна, што пры гэтым Варажбітаў ходзіць з татуіроўкай 1.3.1.2 на жываце. Гэтыя лічбы шыфруюць абрэвіятуру A.C.A.B., якая перакладаецца прыкладна як «усе мянты вылюдкі». У Беларусі гэтае спалучэнне літар прызнанае экстрэмісцкім.
Канал Варажбітава на ютубе моцна страціў у праглядах пасля дэпартацыі ў Беларусь. Раней кантэнт у асноўным рабіўся за кошт гутарак са скінхэдамі, футбольнымі хуліганамі, удзельнікамі «СВА». Запісваць у Беларусі такое складана.
«Калі ён быў у фанацкім варушняку, то старэйшыя ўстаўлялі Мікіту троху мазгі. Пасля пераезду ў Расію ён зусім «паехаў». Цяпер, выглядае, што працуе на беларускіх мянтоў», — сказаў адзін з магілёўскіх фанатаў, які перасякаўся з Варажбітавым на сектары.
Цяпер чытаюць
Польшча прызнала Аляксандра Машэнскага непажаданай асобай34
Каментары