Прэм’ер-міністр Літвы Гінтаўтас Палуцкас вырашыў сысці ў адстаўку як з пасады кіраўніка ўрада, так і з пасады старшыні Літоўскай сацыял‑дэмакратычнай партыі, паведамілі крыніцы LRT.lt.
Пазней навіну пацвердзіў і прэзідэнт Гітанас Наўседа, які паведаміў, што прэм’ер-міністр Гінтаўтас Палуцкас сёння раніцай абвясціў пра сваю адстаўку.
Раней незалежныя расследавальнікі з «Laisvės TV» і цэнтра «Siena» паведамілі, што кампанія Garnis, заснаваная Палуцкасам і яго партнёрам, атрымала льготны крэдыт у 200 000 € ужо пасля прызначэння Палуцкаса прэм’ерам. Пасля гэтага выявіліся звесткі пра невернутыя крэдыты яго іншай фірмы Sagerta і сумнеўныя здзелкі з бізнэсменам Дарусам Вілчынскасам, у якога Палуцкас, мяркуючы па ўсім, набыў нерухомасць у 2012 годзе.
Акрамя таго, журналісты даведаліся, што ў 2012 годзе кіпрская фірма прадала Палуцкасу кватэру ў цэнтры Вільні са зніжанай цаной, калі той працаваў у мэрыі. Таксама вызначылі, што толькі 8 ліпеня 2025 года ён пагасіў астатнюю частку шкоды, прысуджанай у межах так званай «справы пра пацукоў».
«Сённяшняя навіна ў тым, што Г. Палуцкас патэлефанаваў раніцай і аб’явіў пра сваю адстаўку», — сказаў прэзідэнт у чацвер.
Днямі спікер Сэйма Саўлюс Сквярняліс заявіў, што партыя «Саюз дэмакратаў «У імя Літвы»» адмовіцца ад удзелу ў кіруючай кааліцыі, калі Палуцкас застанецца прэм’ерам. Ён абмеркаваў сітуацыю з прэзідэнтам Гітанасам Наўседам, які даў Палуцкасу два тыдні для тлумачэнняў або разважанняў пра сваю палітычную адказнасць. Аднак замест тлумачэнняў Палуцкас пайшоў у адпачынак, а скандалы працягвалі абвастрацца.
У чацвер стала вядома, што Служба расследавання фінансавых злачынстваў правяла ператрусы ў кампаніі жонкі брата Палуцкаса — Dankora, якая атрымала еўрапейскія субсідыі і закупляла акумулятарныя сістэмы ў фірмы Garnis, часткова якая належыць самому прэм’еру. Фінальным ударам стала інфармацыя пра тое, што кампанія Dankora, звязаная з сям’ёй Палуцкаса, атрымала еўрапейскую дапамогу, значную частку якой патраціла на закупкі ў яго ж кампаніі. Пасля розгаласу фірма спяшалася адмовіцца ад субсідыі.
Нягледзячы на ўсё гэта, Палуцкас да апошняга адмаўляў абвінавачванні, а прэзідыум яго партыі заяўляў, што ён павінен працягваць працу да завяршэння расследаванняў. Аднак палітычны ціск, як бачна, аказаўся занадта моцным.
-
«Паліць нафтаперапрацоўчыя заводы». Кіт Келаг параіў, што трэба рабіць Украіне пасля папярэджанняў Трампа
-
У Францыі хакеры ўзламалі халадзільнікі ў сотнях супермаркетаў. Замест мінусавой тэмпературы яны сталі даваць плюсавую
-
У Германіі затрымалі падазраваных у падпале станцыі Starlink у Польшчы. Яны іншаземцы
Каментары