«Азіяцкія Гаваі». Чым пляжны адпачынак на востраве ў Кітаі падабаецца беларусам
«Белавія», якая ўжо лятае з Мінска да кітайскага горада Урумчы, з кастрычніка адкрые новы турыстычны кірунак — на востраў Хайнань. Тураператары прадказваюць вялікі попыт на квіткі і рыхтуюць праграмы на далёкі курорт. Што пра яго расказваюць падарожнікі і турагенты?
Замест дзвюх перасадак — прамы рэйс з Мінска
«Час у дарозе ад [плошчы] Арджанікідзе ў Магілёве да вострава Хайнань заняў роўна 36 гадзін», — распавядае у тыктоку Сяргей, адзін з беларускіх турыстаў.
На «азіяцкія Гаваі», як часам называюць Хайнань, мужчына паехаў у ліпені разам з жонкай — у вясельнае падарожжа. Мяркуючы па блогу Сяргея, вандроўка ім вельмі спадабалася. Але ляцець на востраў ім давялося праз Маскву і з дадатковай перасадкай ужо ў Кітаі.
«Неверагоднае месца з шыкоўным кліматам. Тут вельмі цёпла, прыгожа, экзатычна. Карцінка шыкоўная, усё свеціцца, усё яскравае. Свет тут проста перавернуты дагары нагамі», — падзяліўся Сяргей.
Пуцёўку да Хайнаня пара набывала ў Магілёве. За квіткі і пражыванне ў гатэлі са сняданкамі на 8 дзён яны заплацілі 1700 даляраў. Яшчэ 500 беларускіх рублёў ім каштаваў трансфер Магілёў-Шарамецьева ў два бакі. На самім востраве яны патрацілі дадатковую тысячу даляраў.
Яшчэ адна беларуска падзялілася ў тыктоку, што яна кожны год выбірае Хайнань для адпачынку. Дзяўчына, якая працуе выкладчыцай кітайскай мовы, вызначыла для сябе некалькі пераваг у такіх вандроўках. Першае — у Кітай не патрэбна віза.
«Другое — гэта руская мова. У многіх месцах вы можаце ўжо заўважыць надпісы па-руску. Калі вы ідзяце ў рэстаран, вам могуць даць меню, дзе ўсё будзе напісана на рускай. У многіх міжнародных гатэлях ёсць людзі, якія размаўляюць па-руску», — расказала яна.
З 8 кастрычніка для аматараў кітайскай культуры запрацуе рэгулярны прамы рэйс з Мінска. Чакаецца, што лятаць вялікі самалёт Airbus A330-200 Мінск-Санья (так называецца горад на поўдні Хайнаня) будзе кожную сераду.
А з лістапада колькасць рэйсаў падвоіцца — дадасца суботні маршрут. Тураператары кажуць, што такая частата вылетаў тлумачыцца папулярнасцю гэтага кірунку сярод беларусаў.
«Белавія» паведаміла, што з кастрычніка квіткі да Саньі будуць каштаваць ад 1325 рублёў у адзін бок і ад 2162 рублёў за квіткі ў два бакі.
Абавязковы ВПН і ніякага «ўсё ўключана»
Беларускія тураператары ўжо цяпер прагназуюць вялікі попыт на пуцёўкі да Хайнаня і рыхтуюць экскурсійныя праграмы. Прапануюць наведаць Цэнтр будызму Наньшань, трапічны лес Янода і іншыя славутасці.
Дырэктар «Рэліз тур» Канстанцін Мацюшкін у сваім тыктоку растлумачыў, што для беларускіх турыстаў адпачынак у Кітаі — кірунак з мноствам цікавых месцаў, трапічным кліматам і нармальнымі цэнамі.
Па яго падліках, цэны на тур у Кітай параўнальныя з візітам у Турцыю — ад тысячы даляраў на чалавека. Калі выбіраць гатэль з пяццю зоркамі, то заплаціць давядзецца каля 1400-1500 даляраў.
На Хайнані Мацюшкін раіць да наведвання тры асноўныя пляжы — Санья Бэй, Ялонг Бэй і Дадунхай.
Сістэмы харчавання «ўсё ўключана» на Хайнані няма (калі не лічыць усяго адзін гатэль, дзе можна паесці тры разы на дзень, але агулам Мацюшкін яго не раіць). У асноўным турыстам прапануюць толькі сняданкі, радзей — сняданкі і вячэру.
«Не хвалюйцеся, калі вы прывыклі адпачываць на стандартных курортах і выходзячы з гатэля бачыць тое, што ніякай інфраструктуры няма, як у Егіпце. На Хайнані з гэтым поўны парадак — там без праблем вы зможаце пайсці ў любую кафэшку паесці. Абсалютна розная кухня — і руская, і еўрапейская, і азіяцкая. Таму нават з дзецьмі будзе нармальна», — запэўнівае ён.
Яшчэ адзін важны момант — звыклыя для беларусаў ютуб і інстаграм, як і іншыя заходнія сацсеткі і месенджары, у Кітаі не працуюць. Для таго, каб імі карыстацца, трэба загадзя спампаваць ВПН — але не факт, што ён запрацуе. Пры гэтым вайфай на востраве ёсць амаль усюды і бясплатны, заўважае Мацюшкін.
Калі вам патрэбны бесперапынны доступ у інтэрнэт, можна падключыць роўмінг ці звярнуцца да кітайскіх аператараў ужо на месцы.
Дырэктар турыстычнага агенцтва дадае, што пляжы на востраве таксама трохі адрозніваюцца ад таго, што людзі прывыклі бачыць на больш папулярных курортах. Напрыклад, часта дазволенага месца для плавання ў вадзе не так шмат. Калі парушыць гэтыя межы, падплываюць ахоўнікі, якія могуць вывесці вас на бераг.
Наведваць Хайнань можна круглы год. Толькі ў студзені-лютым там становіцца прыблізна па +24 градусы, кажа Мацюшкін. Самы пік турыстычнага сезона на «азіяцкіх Гаваях» — восень і вясна. У адрозненне ад Егіпта ці Турцыі летам там могуць час ад часу ісці дажджы.
А колькі каштуе паездка ў Урумчы?
Санья — не першы кітайскі горад, куды адкрыліся прамыя рэйсы з Мінска. Беларускія турысты ўжо лётаюць ва Урумчы — горад на поўначы краіны, які з'яўляецца сталіцай уйгураў.
Вандроўка ва Урумчы на дваіх чалавек на восем дзён, расказала блогерка Таццяна, каштавала ім з хлопцам 1274 даляры. Але гэта пры ўмове, што квіткі на самалёт яны набылі па акцыі — па 530 даляраў.
За жыллё ў Кітаі маладзёны заплацілі 190 даляраў, яшчэ 178 даляраў — за ўваходныя квіткі ў музеі і турыстычныя цэнтры. Харчаванне ім каштавала 115 даляраў.
Цяпер чытаюць
«Абмяркоўваем пытанне аб вызваленні яшчэ 1300 зняволеных». Трамп расказаў, пра што гаварыў з Лукашэнкам22
Каментары