Як беларусам запаўняць анкету, неабходную для паездкі ў Латвію ці транзітам праз яе

Анкету трэба падаваць не пазней чым за 48 гадзін да ўезду ў Латвію. Яна абавязковая і для тых, хто едзе ў саму Латвію, і для тых, хто будзе там транзітам. 

Сайт IEM, дзе неабходна запаўняць электронную дэкларацыю, падтрымлівае дзве мовы — латышскую і англійскую.

Крок першы: неабходна пазначыць краіну свайго грамадзянства, а таксама адказаць, ці маеце вы візу або дазвол на жыхарства, якія выдала менавіта Латвія. Тут жа трэба адказаць, ці маеце вы нейкія спецыфічныя абставіны, а канкрэтна ці з’яўляецеся супрацоўнікам дыпламатычнай ці консульскай службы або ваша кораткатэрміновая (у тым ліку транзітная) паездка звязаная з абслугоўваннем пасольства або міжнароднай арганізацыі.

Павялічыць

Крок другі: трэба напісаць адрас сваёй электроннай пошты і потым атрымаць спасылку-пацвярджэнне. Сістэма аўтаматычна праверыць, ці трэба вам увогуле запаўняць гэтую дэкларацыю (але калі вы беларус без латвійскай візы ці ДНЖ — трэба).

Крок трэці: па спасылцы ў пошце вы пераходзіце на сайт і адказваеце на стандартныя пытанні: імя, прозвішча (як лацініцай, так і кірыліцай), грамадзянства, дата нараджэння, пашпартныя даныя, нумар тэлефону.

Наступны блок пытанняў тычыцца таго, якім чынам вы плануеце трапіць у Латвію: праз аэрапорт, чыгунку, порт, аўтобусам або на прыватным аўтамабілі.

Далей трэба пазначыць нумар рэйса ці маршрута (звычайна ёсць у квітку) і нумар месца. Тут можна паставіць птушачку «невядома».

Далей неабходна пазначыць горад і краіну, адкуль пачынаецца ваша вандроўка ў Латвію (то-бок, калі выязджаеце з Мінска, то яго і пішыце) і куды прыбываеце ў Латвію (калі на рыжскі аўтобусны вакзал, упісваеце Рыгу).

Потым абіраеце з прапанаваных варыянтаў мэту свайго прыезду — напрыклад, турызм. Пазначаеце адрас, па якім плануеце жыць. Калі гэта вандроўка на адзін дзень, то адрас можна не пазначаць.

Павялічыць

У полі Travel itinerary, other information трэба коратка апісаць свой маршрут і дадаць падрабязнасці, якія не ўвайшлі ў папярэднія палі. Напрыклад, калі вы плануеце наведаць некалькі гарадоў Латвіі, пазначаеце іх усе.

Далей будуць пытацца аб тым, якім чынам вы плануеце пакінуць тэрыторыю Латвіі. Зноў трэба абраць паміж самалётам, цягніком, караблём, аўтобусам і прыватным аўто.

Калі не ведаеце нумар рэйса і месца, зноў ставіце птушачку unknown/not applicable. Неабходна пазначыць месца, адкуль пачнецца ваш ад’езд (напрыклад, Рыга), і месца, куды вы рухаецеся (напрыклад, вяртаецеся ў Мінск).

Наступны блок пытанняў — палітычны:

— Ці займалі вы ці хто-небудзь з вашых сваякоў выбарную пасаду?

— Ці вы калі-небудзь удзельнічалі ў выбарах як кандыдат?

— Ці працавалі вы калі-небудзь дзяржаўным служачым у органах дзяржаўнага кіравання або мясцовых органах улады?

— Вы калі-небудзь служылі ва ўзброеных сілах, разведцы або службах бяспекі, памежным кантролі, мытні, унутраных спраў, юстыцыі або замежных спраў (у тым ліку дыпламатычных)?

Трэба кожны адказаць «так» ці «не».

Павялічыць

Крок чацвёрты: вы пабачыце на экране ўсе свае адказы. Праверце, ці ўсё пазначана дакладна, і пасля гэтага пастаўце птушачку, што ўся інфармацыя пададзена карэктна і праўдзіва.

Крок пяты: пасля таго, як пацвердзіце, што вы не робат, анкета паляціць па неабходным адрасе.

Крок шосты: чакайце адказ. Ён павінен прыйсці цягам 48 гадзін.

Важныя нюансы: запаўняць анкету больш зручна з камп’ютара, чым з тэлефона. У памежных чатах можна пабачыць, што людзі скардзяцца, што сістэма не дае працягваць запаўненне анкеты (асабліва на другім кроку). Калі вы не можаце перайсці да наступных пытанняў, проста гартайце старонку ўніз — хутчэй за ўсё, вы не пабачылі пытанняў, якія ідуць ніжэй.

• 5
• 5
• 0
• 16
• 1
• 0
• 4
• 1