Пасля выбуху на «Беларуськаліі» спецыялісты праверылі стан паветра ў рэгіёне
Пасля інцыдэнту, які адбыўся 31 кастрычніка на прамысловай пляцоўцы чацвёртага рудаўпраўлення «Беларуськалія», спецыялісты санітарна-эпідэміялагічнай службы правялі праверку якасці паветра.
Як паведамілі ў Міністэрстве аховы здароўя, пробу паветра бралі і аналізавалі ў Салігорску і населеных пунктах Любанскага раёна. Даследаванні паказалі, што ўтрыманне пароў салянай кіслаты не перавышае дапушчальных нормаў.
Раней паведамлялася, што ў выніку выбуху пустой ёмістасці з-пад салянай кіслаты пацярпелі чатыры чалавекі. Пацярпелых з рознай ступенню апёкаў і траўмаў перавезлі ў Мінск — у Рэспубліканскі апёкавы цэнтр і нейрарэанімацыю бальніцы хуткай дапамогі. Ім аказваецца ўся неабходная медыцынская дапамога, стан пацярпелых стабільна цяжкі.
Следчы камітэт Салігорскага раёна распачаў крымінальную справу па факце парушэння правіл бяспекі працы, што прывяло да траўмавання людзей.
Каментары