Прэзідэнт Сірыі Ахмед аш-Шараа прыбыў у Вашынгтон з афіцыйным візітам, паведамляе сірыйскае інфармагенцтва. Візіт стаў магчымы пасля таго, як Вашынгтон выключыў аль-Шараа са спісу асоб, звязаных з тэрарызмам.
Пра гэтае рашэнне амерыканскага ўрада Дзярждэпартамент абвясціў у пятніцу. Як патлумачыў прадстаўнік Дзярждэпа Томі Пігат, гэты крок адлюстроўвае «прагрэс, дасягнуты сірыйскім кіраўніцтвам пасля сыходу Башара Асада і пяцідзесяці з лішкам гадоў рэпрэсій рэжыму», піша BBC.
Паводле яго слоў, цяперашнія ўлады Сірыі выконваюць шэраг патрабаванняў ЗША — у прыватнасці, супрацоўнічаюць у пошуку амерыканцаў, якія прапалі на сірыйскай тэрыторыі, і робяць намаганні па ліквідацыі запасаў хімічнай зброі, якія засталіся ў краіне.
Раней аш-Шараа, які меў сувязі з «Аль-Каідай», лічыўся ў амерыканскім спісе «асабліва небяспечных міжнародных тэрарыстаў», а за яго затрыманне была прызначана ўзнагарода.
Сілы, падтрыманыя Турцыяй і краінамі Персідскага заліва, якія ўзначальвае аш-Шараа, прыйшлі да ўлады ў Сірыі амаль год таму, у выніку імклівага наступлення на Дамаск.
У панядзелак сірыйскі лідар наведае Белы дом, дзе сустрэнецца з прэзідэнтам ЗША Дональдам Трампам, які паабяцаў аказаць падтрымку «новай Сірыі».
Саюзнік ЗША Ізраіль выступае супраць збліжэння з Дамаскам і пасля падзення рэжыму Асада нанёс дзясяткі ўдараў па сірыйскай тэрыторыі з мэтай не дапусціць пераходу вайсковага арсенала ў рукі новага ўрада, які Ізраіль лічыць радыкаламі-ісламістамі.
Каментары