Затрымалі падлетка з Мінска, які прадаваў фальшывыя квіткі на канцэрт расійскага рэпера Мота
17‑гадовы падлетак з Мінска некалькі разоў прадаў адны і тыя ж білеты на канцэрт, паведамілі ў ГУУС Мінгарвыканкама. Некалькі падманутых грамадзян звярнуліся ў міліцыю.
Удакладняецца, што яны набылі ў інтэрнэце электронныя білеты на канцэрт у «Мінск-Арэне», аднак не змаглі па іх трапіць на мерапрыемства. Таксама сілавікі зафіксавалі аналагічныя паведамленні, размешчаныя ў інтэрнэце.
У выніку аператыўных дзеянняў быў затрыманы падазраваны. Паводле інфармацыі ГУУС, малады чалавек, вучань аднаго з мінскіх каледжаў, прызнаўся, што купіў шэсць білетаў на канцэрт замежнага спевака і збіраўся наведаць яго з сябрамі, але праз некаторы час перадумаў.
Спачатку ён прадаў праз інтэрнэт сапраўдныя білеты. Затым зрабіў некалькі копій, змяніў у іх нумары, месцы пасадкі і кошт. Таксама размясціў аб'яву аб іх продажы на гандлёвай пляцоўцы. Так малады чалавек з лістапада 2025 года рэалізоўваў падробленыя білеты сярод жыхароў Мінска і іншых гарадоў. У цэлым ён выручыў больш за 3,5 тысячы рублёў. Грошы патраціў на прадукты і анлайн-гульні, сказана ў паведамленні ведамства.
Малады чалавек прызнаў віну і ўжо кампенсаваў пацярпелым частку шкоды. Раней да крымінальнай адказнасці ён не прыцягваўся, але трапляў у поле зроку міліцыі.
У паведамленні міліцыі не гаворыцца, на які менавіта канцэрт прадаваў фальшывыя квіткі падлетак, але з агульнага кантэксту відавочна, што гаворка ідзе пра канцэрты расійскага спевака Мота (Мацвея Мельнікава), якія праходзілі 14 і 15 лютага на «Мінск-арэне». Раней паведамлялася, што некаторыя патэнцыйныя гледачы канцэрта сталі ахвярай махлярства.
Цяпер чытаюць
28‑гадовую ўкраінку з Марыупаля асудзілі ў Мінску за палітыку. Чаму яна апынулася ў Беларусі, няясна3
Каментары