«Затрымліваюць усіх, каго ўчора не было». Сілавікі зноў прыходзілі ў офіс ZROBIM architects
У мінскім офісе вядомай архітэктурнай студыі ZROBIM architects другі дзень запар працавалі сілавікі. Паводле інфармацыі выдання «Люстэрка», 10 красавіка там зноў адбываліся затрыманні. На працоўныя месцы выклікалі ўсіх супрацоўнікаў, у тым ліку тых, каго не было падчас першага візіту сілавікоў.
Як расказала «Люстэрку» знаёмая з сітуацыяй крыніца, раніцай 10 красавіка ў мінскі офіс ZROBIM architects зноў прыходзілі сілавікі. Паводле слоў крыніцы, як і напярэдадні, следчыя дзеянні праводзілі супрацоўнікі Дэпартамента фінансавых расследаванняў.
Суразмоўца паведаміў, што большасць з прыкладна 50 супрацоўнікаў, затрыманых 9 красавіка, былі адпушчаныя. Аднак заснавальнік кампаніі Андрэй Макоўскі (Андрусь Bezdar), паводле папярэдніх даных, застаецца пад вартай. Другі сузаснавальнік студыі, Аляксей Караблёў, знаходзіцца ў ЗША.
«Затрымліваюць усіх, каго ўчора не было на працоўных месцах. Сёння сказалі ўсім выйсці ў офіс», — дадала крыніца.
Хто менавіта аддаў такое распараджэнне, ёй невядома.
Перад гэтым раніцай 9 красавіка сілавікі прыйшлі ў мінскі офіс ZROBIM architects. Як паведамлялі тады «Люстэрку» дзве не звязаныя паміж сабой крыніцы, былі затрыманыя ўсе, хто знаходзіўся на месцы — каля 50 чалавек. Таксама быў недаступны працоўны сервер кампаніі.
Афіцыйна прычыны цікавасці сілавікоў да адной з самых паспяховых архітэктурных студый Беларусі дагэтуль не агучаныя. Увечары, аднак, адзін з блізкіх да сілавікоў тэлеграм-каналаў звязаў затрыманні з допісам заснавальніка кампаніі Андрэя Макоўскага ў сацыяльнай сетцы Threads.
У пачатку сакавіка прадпрымальнік расказаў, што ў кампанію прыйшоў ліст ад дзяржаўных органаў з патрабаваннем наняць у штат ідэолага. Прапагандысты расцанілі гэты допіс як незадавальненне.
«Ну, і вынік сябе чакаць не прымусіў. Проста там, дзе няма ідэолагаў, — змагарства пачынае расці як цвіль, даводзіцца больш радыкальнымі сродкамі парадак наводзіць», — гаварылася ў паведамленні.
Цяпер чытаюць
Чым цяпер займаюцца дзяўчаты, якіх летась назвалі самымі прыгожымі ў Беларусі?14
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2222
Каментары