«Zatrymlivajuć usich, kaho ŭčora nie było». Siłaviki znoŭ prychodzili ŭ ofis ZROBIM architects
U minskim ofisie viadomaj architekturnaj studyi ZROBIM architects druhi dzień zapar pracavali siłaviki. Pavodle infarmacyi vydańnia «Lusterka», 10 krasavika tam znoŭ adbyvalisia zatrymańni. Na pracoŭnyja miescy vyklikali ŭsich supracoŭnikaŭ, u tym liku tych, kaho nie było padčas pieršaha vizitu siłavikoŭ.
Jak raskazała «Lusterku» znajomaja ź situacyjaj krynica, ranicaj 10 krasavika ŭ minski ofis ZROBIM architects znoŭ prychodzili siłaviki. Pavodle słoŭ krynicy, jak i napiaredadni, śledčyja dziejańni pravodzili supracoŭniki Departamienta finansavych rasśledavańniaŭ.
Surazmoŭca paviedamiŭ, što bolšaść z prykładna 50 supracoŭnikaŭ, zatrymanych 9 krasavika, byli adpuščanyja. Adnak zasnavalnik kampanii Andrej Makoŭski (Andruś Bezdar), pavodle papiarednich danych, zastajecca pad vartaj. Druhi suzasnavalnik studyi, Alaksiej Karabloŭ, znachodzicca ŭ ZŠA.
«Zatrymlivajuć usich, kaho ŭčora nie było na pracoŭnych miescach. Siońnia skazali ŭsim vyjści ŭ ofis», — dadała krynica.
Chto mienavita addaŭ takoje rasparadžeńnie, joj nieviadoma.
Pierad hetym ranicaj 9 krasavika siłaviki pryjšli ŭ minski ofis ZROBIM architects. Jak paviedamlali tady «Lusterku» dźvie nie źviazanyja pamiž saboj krynicy, byli zatrymanyja ŭsie, chto znachodziŭsia na miescy — kala 50 čałaviek. Taksama byŭ niedastupny pracoŭny siervier kampanii.
Aficyjna pryčyny cikavaści siłavikoŭ da adnoj z samych paśpiachovych architekturnych studyj Biełarusi dahetul nie ahučanyja. Uviečary, adnak, adzin ź blizkich da siłavikoŭ telehram-kanałaŭ źviazaŭ zatrymańni z dopisam zasnavalnika kampanii Andreja Makoŭskaha ŭ sacyjalnaj sietcy Threads.
U pačatku sakavika pradprymalnik raskazaŭ, što ŭ kampaniju pryjšoŭ list ad dziaržaŭnych orhanaŭ z patrabavańniem naniać u štat ideołaha. Prapahandysty rascanili hety dopis jak niezadavalnieńnie.
«Nu, i vynik siabie čakać nie prymusiŭ. Prosta tam, dzie niama ideołahaŭ, — zmaharstva pačynaje raści jak ćvil, davodzicca bolš radykalnymi srodkami paradak navodzić», — havaryłasia ŭ paviedamleńni.
Kamientary