Беларусаў шакаваў стан жывёл у «Дукорскім маёнтку»: «Гэта канцлагер!» Спецыялісты супакойваюць
У сацыяльных сетках шырокі рэзананс выклікала відэа пра ўмовы ўтрымання жывёл у «Дукорскім маёнтку» Пухавіцкага раёна. Адна з наведвальніц па імені Таццяна назвала мясцовы заасад «канцлагерам» і заявіла, што бачыла там хворага і кульгавага аленя, а таксама яка з гнілой ранай на спіне. У нюансах справы, якая набыла рэзананс, паспрабавала разабрацца выданне «Анлайнер».
Беларуска, якая прыехала на экскурсію ў музейны комплекс «Дукорскі маёнтак», апублікавала ў інстаграме відэа з мясцовага заасада і падпісала:
«Гэта канцлагер!» «Коні худыя, алені гэтыя ўсе хворыя, кульгавыя — гэта нейкі жах! […] Паглядзіце, у якім стане як: у яго мяса гніе проста на самой жывёліне, мухі поўзаюць [па адкрытай ране]», — кажа за кадрам жаночы голас, апісваючы ўбачанае.
«Анлайнер» звязаўся з кіраўніцтвам комплексу і папрасіў пракаментаваць гэта відэа.
Музейны комплекс «Дукорскі маёнтак» у аграгарадку Дукора працуе ўжо больш за дзесяць гадоў. Па сутнасці, гэта папулярны этнаграфічны музей пад адкрытым небам. Сюды едуць паглядзець на знакаміты «перакулены дом», дакрануцца да шляхецкай культуры і заадно прагуляцца па мясцовым заасадзе.
Менавіта жывёлы і прыцягнулі ўвагу наведвальніцы па імені Таццяна, якая прыехала ў сядзібу ўпершыню. Шакаваная ўбачаным, яна зняла ролік і выклала яго ў сацсеткі.
«Як вам не сорамна? Мы першы раз у Дукоры. Гэта Беларусь, недалёка ад Мінска. Ехалі на экскурсію ў музей і нават не думалі, што тут ёсць заасад. Я не ведаю, што рабіць у такіх выпадках. Скаргу на «Обращения.бел» мы ўжо напісалі, але, напэўна, трэба, каб як мага больш людзей звярнулі на гэта ўвагу. Магчыма, гэта вырашыць пытанне з жахлівым утрыманнем жывёл. «Дукорскі маёнтак», як вам не сорамна так ставіцца да звяроў?» — напісала наведвальніца.
На кадрах — казуля, якая ледзь перасоўваецца, і як з дзіўнай пралысінай на спіне і адкрытай ранай, вакол якой рояцца мухі.
Публікацыя выклікала вялікі рэзананс. У каментарыях людзі заклікаюць пісаць скаргі ў пракуратуру і «ратаваць бедных звяроў». Знайшліся і тыя, хто стаў на абарону комплексу. Некаторыя карыстальнікі адзначылі, што бывалі ў Дукоры ў маі мінулага года і жывёлы выглядалі выдатна. Іншыя выказалі здагадку, што звяроў «маглі прывезці ў сядзібу на лячэнне і ператрыманне».
Журналісты звярнуліся да кіраўніцтва музейнага комплексу за каментарыем. На пытанні па тэлефоне адказаў галоўны інжынер Мікалай Карнееў. Той патлумачыў, што ў адміністрацыі пра скандальнае відэа ўжо ведаюць і якраз рыхтуюць афіцыйны відэаадказ для свайго Instagram.
«Бывае, нам аддаюць хворых або траўмаваных дзікіх жывёл на аднаўленне. Месяцы тры таму так да нас трапіла казуля, яшчэ раней — козлік (той самы, які на відэа). У яго надрыў звязак. Людзі яго выхадзілі і прывезлі да нас. Паводле слоў ветэрынара, козлік можа аднавіцца, а можа так і застацца кульгавым. Ён зараз пад наглядам і знаходзіцца на свабодным выгуле», — тлумачыць прадстаўнік комплексу.
Што тычыцца непрывабнага знешняга выгляду некаторых іншых насельнікаў заасада, то спецыяліст спісвае ўсё на сезоннасць: зараз перыяд лінькі.
«Як з'явіўся ў нас тры гады таму. У яго прыроджаная аплазія скуры (недаразвіццё скурных пакроваў. — Заўв. «Анлайнер»). Гэтая хвароба, на жаль, невылечная. Што тычыцца аблезлай поўсці, то гэта дзікая жывёліна, у яе зараз ідзе актыўны перыяд лінькі. Звяры труцца аб дрэвы і агароджы, старая поўсць сыходзіць жмутамі, а пад ёй расце новая. Выглядае гэта сапраўды не вельмі прэзентабельна, але гэта прыродны працэс».
Спецыяліст таксама заўважыў, што ўсе жывёлы комплексу знаходзяцца пад кантролем, аглядаюцца ветэрынарам і харчуюцца згодна з устаноўленымі нормамі.
На гэты момант працу музейнага комплексу «Дукорскі маёнтак» правяраюць прадстаўнікі Мінпрыроды і ветэрынары раёна. Пра гэта «Анлайнеру» паведаміў той жа Мікалай Карнееў. Пазней сітуацыю пракаментаваў галоўны ветдоктар Мінскай вобласці Алег Карповіч.
Спецыяліст расказаў выданню «Мінская праўда», што жывёлы ў «Дукорскім маёнтку» знаходзяцца ў «нармальным, добрым стане», забяспечаныя кормам, вадой і «не знясіленыя». Аднак, паводле яго слоў, яку і казулі патрабуецца ветэрынарная дапамога.
«Яка апрацуем, усыпім, змесцім яго ў асобную клетку і будзем назіраць ветэрынарнай службай раёна, — патлумачыў Алег Карповіч. — Мы таксама абследавалі казулю: у яе расцяжэнне звязак. Забяром яе ў клініку і будзем працягваць лячэнне».
Што тычыцца авечак, знешні выгляд якіх таксама выклікаў пытанні ў наведвальнікаў, то з імі, запэўніў ветдоктар, усё ў парадку, ім толькі спатрэбіцца стрыжка, якой зоймуцца ў найбліжэйшы час.
«А як карміць, хлебам хіба?» У магілёўскім заасадзе дзеці глядзелі на адсечаную галаву казулі ў ваўчыным вальеры
Колькі каштуе леў і дзе купіць вярблюда? Беларуска 18 гадоў таму пераехала ў вёску і завяла заасад
У Магілёўскім заасадзе з'явіўся рэдкі белы вярблюд
Маладая рысь трапіла ў капкан у Бабруйскім раёне, потым давялося рабіць аперацыю
Каментары