Telegram выдаліў свой афіцыйны беларускі канал — верагодна, каб не падстаўляць людзей. Але многія паспелі падставіцца
Цяпер ужо мала хто ўспомніць, што 15 жніўня 2020 года з'явіўся канал «Telegram Беларусь». Гэта быў афіцыйны канал месенджара для беларускай аўдыторыі, якая выбухова вырасла на фоне блакіровак медыя і інтэрнэту. У канале было праведзенае тэставае апытанне «За каго вы галасавалі на выбарах?» толькі для беларускіх карыстальнікаў. Праз гады пра гэта ўспомнілі ў органах.
Тое апытанне сабрала 10,6 мільёна праглядаў і 2,41 мільёна галасоў.
Галасаваць за канкрэтных кандыдатаў маглі толькі карыстальнікі з беларускімі сім-картамі — Telegram тады ўпершыню тэставаў такую механіку. Астатнім заставаўся варыянт «Я не з Беларусі».
Вынік то аказаўся чаканым. З 1,64 мільёна карыстальнікаў з Беларусі за Святлану Ціханоўскую галасавалі 75%, а за Аляксандра Лукашэнку — 6%.
На наступны дзень, 16 жніўня, у канале з’явіўся яшчэ адзін пост. Павел Дураў паведаміў, што Apple патрабуе заблакаваць каналы, якія публікуюць даныя сілавікоў і прапагандыстаў, і вынес пытанне на галасаванне — ці рабіць так. 67% выказаліся супраць блакіроўкі.
Пасля гэтага канал сціх: за шэсць гадоў у ім не з’явілася ніводнага новага паведамлення.
Але свой ужытак гэтым даным праз гады знайшлі ў рэпрэсіўных органах. Па аналогіі з тым, як нагодай для чыстак сярод чыноўнікаў стаў факт падпіскі за Віктара Бабарыку, Валерыя Цапкалу ці Святлану Ціханоўскую, так і галасаванне ў гэтым канале стала нагодай для звальненняў.
Хаця апытанне і было ананімным, але на прыладзе самога карыстальніка відаць, за каго ён галасаваў, калі ён не мяняў акаўнты.
Такім чынам, як стала вядома «Нашай Ніве», цягам гэтага года кадравікі-спецслужбісты ў дзяржаўных арганізацыях атрымалі інструкцыі адкрываць з мабільніка супрацоўніка канал «Telegram Беларусь» пры правядзенні праверак (калі чалавека прымалі на працу ці збіраліся павысіць).
Калі аказвалася, што чалавек не мяняў акаўнт і прыняў удзел у галасаванні, паказаўшы свой голас за Ціханоўскую — звальненне.
Колькі такіх выпадкаў адбылося па краіне, невядома, але інфармацыя пра некаторыя з іх пацверджаная.
Як можна разумець, гэтая інфармацыя дайшла і да самой платформы. Гэты нежывы афіцыйны канал яшчэ быў даступны ў маі 2026 года (на той момант у ім заставалася 11,5 тысяч падпісчыкаў). Цяпер жа ён перастаў існаваць.
«Наша Нiва» — бастыён беларушчыны
Цяпер чытаюць
Telegram выдаліў свой афіцыйны беларускі канал — верагодна, каб не падстаўляць людзей. Але многія паспелі падставіцца1
Каментары