У Расіі абверглі інфармацыю пра бунт зняволеных у цягніку на Каўказе. Бунтаваў толькі адзін
Федэральная служба выканання пакаранняў (ФСВП) Расіі абвергла паведамленні пра бунт у цягніку з зняволенымі, які рухаўся па Паўночна-Каўказскай чыгунцы.
Як сцвярджае служба, на станцыі Муртазава ў Кабардзіна-Балкарыі адбыўся не бунт, а напад аднаго з асуджаных на супрацоўніка канвою. Зняволены падчас вываду ў туалет напаў на канваіра і завалодаў яго табельнай зброяй.
У выніку нападу адзін супрацоўнік ФСВП загінуў, яшчэ трое атрымалі раненні. Іншыя супрацоўнікі канвою, якія прыбылі на дапамогу, застрэлілі нападніка. Сярод цывільных асоб пацярпелых не было.
3 кастрычніка ФСВП паведаміла, што сям'і загінулага супрацоўніка і пацярпелым будзе аказаная неабходная дапамога. Супрацоўнікі УФСВП па Стаўрапольскім краі, якія прадухілілі ўцёкі з-пад варты, будуць прадстаўленыя да дзяржаўных узнагарод Расіі. Адна з узнагарод будзе прысуджаная пасмяротна.
Каментары