Лукашэнка заявіў, што рыхтуюцца змены ў рэгуляванні працы ПВТ
На разгляд Аляксандра Лукашэнкі ўнесеныя праекты прававых актаў аб развіцці ПВТ, у якіх закладзены «нестандартны падыход». Пра гэта ішла гаворка на нарадзе, перадае БЕЛТА.
«Мне ўнесеныя праекты прававых актаў аб развіцці Парка высокіх тэхналогій. Падыход нестандартны. Але ў гэтай сферы практычна заўсёды патрэбныя нейкія крэатыўныя рашэнні», — заявіў Лукашэнка.
Якія змены чакаюць ПВТ, не паведамляецца.
Лукашэнка сцвярджае, што гаворка ідзе «пра другое дыханне і раней недаступныя гарызонты для парку, ды і ўсёй беларускай IT-галіны». «Трэба асвоіць новыя рынкі, замясціць заходнія інвестыцыі азіяцкімі», — абазначыў арыенціры Аляксандр Лукашэнка.
«І наогул, калі недзе ствараецца дастойны прадукт, якія б ні былі перашкоды, платы і перашкоды, гэты прадукт будзе запатрабаваны, яго купяць», — распавёў Лукашэнка.
«Цяпер наш ПВТ, які доўгі час аўтарытэтныя спецыялізаваныя выданні называлі «раем для праграмістаў» і «Крэмніевай далінай Усходняй Еўропы», хочуць задушыць эканамічна. Такія спробы робяцца», — сцвярджае Лукашэнка.
Праз фальсіфікацыю выбараў, гвалт пасля іх і суагрэсію Беларусі з Расіяй супраць Украіны буйныя айці-кампаніі і самі айцішнікі з’язджаюць з краіны. У 2022 годзе IT-сектар страціў больш за 16,5 тысячы спецыялістаў.
Чытайце таксама:
Лукашэнка: Я стаяў ля вытокаў працы эміратцаў па штучным інтэлекце
Галоўная IT-ВНУ краіны распавяла, колькі студэнтаў плануе набраць сёлета
«Айцішнікі не бунтуюць, ну і хрэн з імі». Лібер пра Янчэўскага, Баграцова і Добкіна