Намеснік дырэктара ПВТ пасля сустрэчы з Лукашэнкам: Перагортваем старонку і працуем на стварэнне эканамічнай моцы
Сёння на нарадзе ў Аляксандра Лукашэнкі вырашыўся лёс ПВТ: яго пакідаюць, «рэжым функцыянавання Парка высокіх тэхналогій застаецца ранейшым». Кіраўніцтва ПВТ пакаялася за дзеянні айцішнікаў у 2020 годзе і паабяцала «працаваць на стварэнне, умацаванне эканамічнай моцы нашай дзяржавы».
На нарадзе Аляксандр Лукашэнка падакараў айцішнікаў за 2020 год, «той мяцеж, які быў навязаны нашаму народу».
«Супрацоўнікі Парка высокіх тэхналогій праявілі сябе, мякка кажучы, не з найлепшага боку. <…> Мы бачылі і атрымлівалі звесткі напярэдадні гэтага мяцяжу, што будуць задзейнічаныя супрацоўнікі ПВТ як рухаючая сіла. І зноў жа, прызнаюся, што ні я, ні спецслужбы не надалі гэтаму належнай увагі. Мы проста адмахнуліся ад гэтага.
Я думаў, ну не можа ж быць, каб твае дзеці пачалі супраць цябе вайну. За гэта і паплаціліся. Аказваецца, што і такія дзеці могуць ваяваць супраць бацькоў, калі ім добра плацяць.
Гэта значыць, нашы людзі (гэта таксама трэба адкрыта прызнаць), якія працуюць у Парку высокіх тэхналогій, атрымліваюць прыстойныя даходы ў параўнанні з сярэдняй зарплатай у Беларусі, аддалі перавагу вялікім грашам і выконвалі каманды сваіх замежных гаспадароў, часцей за ўсё заакіянскіх», — сказаў ён.
Пасля гэтага, паводле Лукашэнкі, у грамадстве «прысутнічае нейкая насцярожанасць» у дачыненні да Парка высокіх тэхналогій, таму «прыйшоў час зняць нейкія непатрэбныя нам нюансы з функцыянаваннем ПВТ».
Пытанне вырашылася станоўча.
«Рэжым функцыянавання Парка высокіх тэхналогій застаецца ранейшым». Пра гэта паведаміў журналістам намеснік дырэктара Адміністрацыі ПВТ Кірыл Залескі па выніках нарады.
«Мы зыходзім з таго, што адкрываем новае дыханне для парка. За апошнія два гады наш IT-сектар, айцішнікі пабывалі ў розных сітуацыях. Большасць шматтысячнай арміі айцішнікаў працавала на эканамічны дабрабыт нашай краіны.
Вядома, былі і тыя, хто праявіў сябе не з самага добрага боку, унёс свой уклад у разбурэнне, у дэструктыўныя працэсы. Сёння мы зыходзім з таго, што гэту старонку перагортваем і працягваем працаваць на стварэнне, на ўмацаванне эканамічнай моцы нашай дзяржавы», — паведаміў ён.
Залескі нічога не сказаў наконт адтоку з ПВТ замежных кампаній і спецыялістаў. Ён сказаў, што зараз сферы ва ўсім свеце цяжка.
«Так здарылася, што IT-галіна ўсяго свету трапіла ў ідэальны шторм. Сёння ўсе глабальныя сусветныя карпарацыі скарачаюць супрацоўнікаў дзясяткамі тысяч чалавек. Па нашых ацэнках, гэты адток не такі вялікі. Мы разумеем, што ёсць абʼектыўныя і субʼектыўныя прычыны. Але ўсё ж мы прыхільнікі стрыманага аптымізму. Думаю, што ў выніку ўсё будзе добра», — выказаў ён аптымізм.
Парк высокіх тэхналогій ужо не раз хавалі ў некаторых СМІ, давалі яму змрочныя прагнозы. Але ён працуе, нягледзячы ні на што, і яшчэ парадуе краіну і здзівіць свет. Упэўненасць у гэтым выказаў журналістам дырэктар Адміністрацыі Парка высокіх тэхналогій Усевалад Янчэўскі.
Паводле яго, галоўны пасыл Лукашэнкі ў адносінах да ПВТ і ІТ-галіны застаецца, па вялікім рахунку, такім жа, якім ён быў на працягу многіх гадоў.
«Прэзідэнт базісна аднойчы вызначыў сваё стаўленне да IT-галіны, лічбавай галіны, да ПВТ (а ён яго вызначыў, калі ствараў парк), так яно і захоўвалася і захоўваецца. Можам сказаць, што кіраўнік дзяржавы яшчэ раз пацвердзіў дакладную, простую і непарушную пазіцыю: Беларусь і кіраўнік дзяржавы заўсёды падтрымлівалі высокія тэхналогіі, IT, ПВТ, і гэта захоўваецца.
Галоўны пасыл — сёння абавязкова трэба глядзець у будучыню, каб маглі спакойна і праграмісты, і кампаніі працаваць, ствараць, тварыць, ісці наперад», — сказаў Янчэўскі.
«Парк, створаны прэзідэнтам, быў гонарам краіны, і ён ім застанецца. І яшчэ парадуе краіну і здзівіць свет», — выказаў упэўненасць ён.
І сама нарада, і выступы пасля яе вылучаліся выключнай ліслівасцю і ўгодлівасцю да Лукашэнкі.
Віцэ-прэмʼер Мікалай Снапкоў, напрыклад, сказаў, што Парк высокіх тэхналогій быў створаны і атрымаў развіццё дзякуючы «кіраўніку дзяржавы». Ён звярнуў увагу на выбуховы рост эканамічных паказчыкаў ПВТ за апошнія 5 год і на абʼём экспарту парка, які фактычна адпавядае экспарту калійнай галіны краіны. І адбылося гэта, паводле Снапкова, дзякуючы Лукашэнку.
«Гэта сурʼёзны ўклад у экспарт і сальда [знешнегандлёвае], што для нас важна вельмі. І гэты выбуховы рост апошнія 5 гадоў — дзякуй вам», — звяртаючыся да Лукашэнкі, сказаў Мікалай Снапкоў. Ён адзначыў, што «ПВТ стаў прыкладам новага напрамку ў эканоміцы, створанага ў Беларусі пры непасрэдным удзеле і садзейнічанні прэзідэнта», піша БелТА.
Насамрэч роля Лукашэнкі ў стварэнні Парка была толькі ў тым, што ён даў згоду на яго — чаго не патрабавалася б у дэмакратычнай краіне.
Цяпер чытаюць
Спецслужбы збіраюць інфармацыю па чатах дыяспары. Найперш шукаюць студэнтаў6
Каментары
С тебя ж потом,дурак янчевский,шкуру сдерут. Хоть ты и выть будешь,что «как лучше хотел». Ты,главное,питайся хорошо. Чтоб дожил до этого святого момента.