У рухавік самалёта «Белавія» пры пасадцы ў Брэсце трапіла птушка
17.02.2025 / 18:54
Самалёт знялі з наступных маршрутаў.
Фота ілюстрацыйнае
Авіякампанія «Белавія» 17 лютага паведаміла пра інцыдэнт з самалётам «Эмбраер-175», які рабіў рэйс па маршруце Масква — Брэст. Адзначаецца, што калі самалёт (бартавы нумар EW-512РО) рабіў пасадку, у ягоны рухавік трапіла птушка.
У паведамленні гаворыцца, што борт «не атрымаў бачных пашкоджанняў, прызямліўся паспяхова, аднак для гарантавання бяспекі далейшых палётаў было прынята рашэнне зрабіць дадатковы тэхнічны агляд судна».
У выніку самалёт быў зняты з наступных маршрутаў і заменены на «Боінг-737». Гэта, як заяўляецца, «пацягнула карэктаванне раскладу».
Паведамляецца пра больш чым чатырохгадзінную затрымку рэйсаў Брэст — Масква, Масква — Гомель, Гомель — Масква, Масква-Мінск. Авіякампанія прынесла прабачэнні пасажырам.
Чытайце таксама:
«Белавія» запусціць рэйс з Магілёва ў Маскву