Год пабудовы — зусім не галоўнае. Як выбіраюць дамы для капітальнага рамонту і колькі плацяць жыхары?
Кіраўніца сталічнай ЖКГ Марына Толсцік распавяла, колькі дамоў адрамантуюць у Мінску ў 2025 годзе, а таксама ў якой прапорцыі капітальны рамонт аплачваюць жыхары.
У Мінску ў 2025 годзе плануецца адрамантаваць 186 жылых дамоў агульнай плошчай больш за мільён квадратных метраў. Гэта складае 3% ад усёй эксплуатуемай плошчы жылога фонду, распавяла генеральная дырэктарка Мінскай гарадской ЖКГ Марына Тоўсцік.
Паводле яе слоў, пры фарміраванні спісу дамоў для капрамонту галоўнымі крытэрамі з’яўляюцца тэхнічны стан жылога дома і яго інжынерных сістэм. Год пабудовы — хоць і важны паказчык, але не вызначальны, піша канал сталічнай ЖКГ.
Тоўсцік адзначыла, што вясной і восенню праводзяцца агляды, падчас якіх камунальныя службы выяўляюць недахопы. Затым заўвагі і прапановы заносяцца ў акты. На іх падставе і складаюцца планы капрамонту. Пры гэтым існуе як бягучая праграма, так і перспектыўная — разлічаная на 5 гадоў.
Найбольш шматпавярховікаў у гэтым годзе адрамантуюць у Партызанскім раёне — 42 адрасы. У Заводскім раёне капрамонт запланаваны для 23 шматпавярховак, у Ленінскім — для 18, у Маскоўскім — для 17, у Кастрычніцкім — для 6. У Першамайскім раёне адрамантуюць 31 дом, у Савецкім — 15, у Фрунзенскім — 16, а ў Цэнтральным — 20.
Паводле слоў Марыны Тоўсцік, капітальны рамонт фінансуецца на 40% за кошт адлічэнняў жыхароў, астатнія 60% дае бюджэт.
Чытайце таксама:
Рэнавацыя пагражае гістарычным помнікам. «Мэтазгоднасць іх капрамонту адсутнічае»
Досвед Масквы. Што абвешчаная рэнавацыя можа прынесці гарадам Беларусі
У Беларусі збіраюцца праводзіць рэнавацыю па шляху Расіі — зносіць хрушчоўкі і перасяляць жыхароў