За кратамі знаходзяцца 76 палітзняволеных у цяжкім фізічным стане
Па стане на 7 красавіка 2025 года праваабаронцам вядома не менш як пра 203 палітвязняў, якія знаходзяцца за кратамі ў асаблівай небяспецы, паведамляе праваабарончы цэнтр «Вясна».
Фота ілюстрацыйнае
Сярод іх — тыя, хто мае праблемы са здароўем, непаўнагадовыя на момант здзяйснення дзеянняў, што ставяцца ім у віну, шматдзетныя, людзі ў цяжкіх сямейных абставінах, а таксама тыя, хто знаходзіцца на прымусовым псіхіятрычным лекаванні ў закрытых установах.
Апроч таго, у гэтую лічбу ўваходзяць палітвязні, якія знаходзяцца ў рэжыме інкамунікада, а таксама тыя, хто не выходзіць з-за кратаў, нягледзячы на тое, што тэрмін пакарання скончыўся.
«У зняволенні мінімум 76 чалавек знаходзіцца ў цяжкім стане фізічнага здароўя, 7 чалавек маюць інваліднасць, 30 сталых людзей, чый узрост перавышае 60 гадоў (шмат хто з іх мае вялікія праблемы са здароўем), а таксама 10 чалавек з ментальнымі разладамі», — паведамляе «Вясна».