EPAM і Wargaming заплацілі ў Літве мінімальныя падаткі за больш чым два гады

Паводле даных Дзяржаўнай падатковай інспекцыі Літвы за першы квартал 2025 года, EPAM і Wargaming застаюцца найбуйнейшымі падаткаплацельшчыкамі сярод ІТ-кампаній у краіне, аднак сумы выплачаных імі падаткаў значна знізіліся, піша Devby.io.

Фота ілюстрацыйнае

Кампанія EPAM Sistemos заняла 4-е месца ў ІТ-сектары і заплаціла 3,7 мільёна еўра падаткаў — на 14% менш, чым у аналагічны перыяд 2024 года. Гэта найменшы паказчык кампаніі за апошнія два з паловай гады.

Зменшыліся і кадры кампаніі: з пачатку года EPAM скараціла больш за 20 супрацоўнікаў. У філіялах у Вільні і Коўне цяпер працуе каля 1200 чалавек, прычым у Вільні ўпершыню менш за 1000 супрацоўнікаў.

У сваю чаргу, Wargaming апынуўся на 5-м месцы і заплаціў 2,94 мільёна еўра — таксама мінімум за апошнія два з ліш гады. Зніжэнне складае 2% у параўнанні з мінулым годам.

Кампанія страціла за квартал больш за 40 супрацоўнікаў, і цяпер у ёй працуе 791 чалавек.

У агульналітоўскім рэйтынгу падаткаплацельшчыкаў EPAM страціў 20 пазіцый і цяпер займае 95-е месца (раней — 75-е). Што да Wargaming, то ён вылецеў з топ-100 яшчэ летась і цяпер знаходзіцца на 127 месцы.

Што тычыцца іншых ІТ-кампаній у Літве з беларускімі каранямі, то іх паказчыкі цяпер такія:

• Gurtam — заплаціла 1,17 млн еўра (крыху больш за леташні паказчык).

• MA (былы Melsoft) — скараціў выплаты з 1,2 да 1 млн еўра.

• Flo — заплаціў 0,6 млн еўра.

• Belka Games — заплаціў 0,1 млн еўра.

Каментары да артыкула