Беларускія кампаніі ў Літве працягваюць скарачаць каманды. Wargaming — у топе па адтоку
З пачатку года літоўскія офісы страцілі сумарна больш за 100 спецыялістаў, вынікае з даных сэрвісу rekvizitai.vz.lt. На пачатак года ў 20+ вядомых ІТ-кампаніях з беларускімі каранямі было зарэгістравана 3,4+ тыс. супрацоўнікаў, цяпер іх менш за 3,3 тыс, паведамляе Devby.io.
Больш за ўсё спецыялістаў з студзеня гэтага года страціў геймдэв. У прыватнасці, толькі з Wargaming і МА (экс-Melsoft LT) сышлі сумарна амаль 70 супрацоўнікаў.
Колькасць зарэгістраваных у Літве супрацоўнікаў з беларускімі ІТ-каранямі
На сёння ў літоўскім офісе Wargaming зарэгістраваны 801 чалавек. Пры захаванні такіх тэмпаў адтоку (каля 10 супрацоўнікаў у месяц) да канца года літоўская каманда можа скараціцца да 700 спецыялістаў. У той жа час кампанія працягвае наймаць людзей у літоўскі офіс. На сайце Wargaming размешчана 16 вакансій для працы ў Літве з указаннем зарплат. У залежнасці ад пазіцыі заробак вагаецца ад 2,5 да 7 тысяч еўра брута.
У MA на пачатку года працавала амаль 200 чалавек, на сёння ўжо 160.
У топ-3 па колькасці звольненых супрацоўнікаў у Літве з пачатку года — EPAM. За мінулы год літоўская каманда скарацілася амаль на 180 чалавек (мінус 12,5%). Цяпер у двух філіялах (у Вільні і Каўнасе) зарэгістравана каля 1,2 тысячы супрацоўнікаў. З студзеня каманда страціла каля 20 спецыялістаў.
З топ-10 найбуйнейшых ІТ-кампаній з беларускімі каранямі ў Літве толькі ў дзвюх колькасць супрацоўнікаў вырасла з пачатку года. У літоўскім офісе Gurtam каманда павялічылася з 218 да 225 чалавек, у Godel — з 90 да 99.
За мінулы год ІТ-сектар Літвы страціў больш за 400 беларускіх айцішнікаў. За гэты год адток можа апынуцца такім жа.
На адток айцішнікаў з Літвы працягвае ўплываць міграцыйная палітыка літоўскіх улад у дачыненні да беларусаў.
Камітэт Сейма Літвы па нацыянальнай бяспецы і абароне на пачатку красавіка падтрымліваў ідэю ануляваць выдадзеныя беларусам дазволы на жыхарства за занадта частыя паездкі дадому — часцей, чым раз на тры месяцы, але рашэнне не было прынятае.
Таксама за мінулы год амаль 600 беларусаў прызналі пагрозай нацыянальнай бяспецы Літвы. Сярод іх ёсць і айцішнікі.
А за першы квартал гэтага года ў Літве стала рэзка менш беларусаў з ДНЖ. Па стане на 1 красавіка ў Літве заставалася 53 739 грамадзян Беларусі з дазволам на жыхарства. Гэта на 3772 чалавекі менш, чым было на пачатку года. Для параўнання, за ўвесь 2024 год колькасць беларусаў з ДНЖ у Літве скарацілася на 4656 чалавек.
Цяпер чытаюць
Дрон прыляцеў у пасажырскі аўтобус на мяжы Расіі і Беларусі10
Каментары
А што Вы жадалі ...