«Гэта будзе зусім новы і значна лепшы свет». Трамп пракаментаваў прапанову Пуціна аднавіць перамовы з Украінай

Прэзідэнт ЗША назваў гэты дзень «патэнцыйна вялікім».

Дональд Трамп. Фота: Anna Moneymaker / Getty Images

Прэзідэнт ЗША Дональд Трамп пракаментаваў прапанову Уладзіміра Пуціна аднавіць мірныя перамовы з Украінай у Стамбуле.

«Патэнцыйна вялікі дзень для Расіі і Украіны! Толькі ўявіце сабе — сотні тысяч жыццяў могуць быць уратаваныя, калі гэтая бясконцая «крывавая лазня» нарэшце скончыцца. Гэта будзе зусім новы і значна лепшы свет.

Я працягну працаваць з абодвума бакамі, каб пераканацца, што гэта адбудзецца. ЗША жадаюць засяродзіцца замест гэтага на аднаўленні і гандлі. Вялікі тыдзень наперадзе!» — напісаў Трамп у сваёй сацсетцы.

Пуцін падчас начнога выступлення прапанаваў аднавіць перамовы без папярэдніх умоваў і падзякаваў ЗША за пасрэдніцтва. У Белым доме раней заяўлялі, што Крэмль патрабуе занадта многа і пагражалі выйсці з перамоўнага працэсу, калі бакі не будуць гатовыя да кампрамісу.

Некалькі дзён таму Трамп заклікаў да месячнага безумоўнага спынення агню і пагражаў санкцыямі за яго невыкананне. Аднак, мяркуючы па ўсім, Пуцін гэтую прапанову адхіліў.

Каментары да артыкула