Беларусаў у Маскве вызвалілі ад абавязковай рэгістрацыі, пад якую трапяць іншыя іншаземцы
У Маскве і Падмаскоўі з 1 верасня 2025 года па 1 верасня 2029 года правядуць эксперымент, у рамках якога іншаземцы, якія прыязджаюць на працу без візы, будуць абавязаныя рэгістравацца праз спецыяльны дадатак.
Мэта эксперыменту — палепшыць кантроль за міграцыяй і зменшыць колькасць правапарушэнняў. Калі вынікі будуць станоўчымі, такую практыку могуць пашырыць і на іншыя рэгіёны Расіі.
Акрамя рэгістрацыі праз дадатак, для іншаземцаў без візы ўвядуць абавязковую рэгістрацыю па месцы знаходжання, зняцце адбіткаў пальцаў, біяметрычнае фатаграфаванне і сачэнне за геалакацыяй тэлефонаў.
Аднак гэтыя правілы не будуць распаўсюджвацца на грамадзян Беларусі і дыпламатаў. Пра гэта заявілі падчас прыняцця закона, які ўжо падпісаў прэзідэнт Расіі Уладзімір Пуцін, піша БелТА.