У Расіі Вікіпедыю абвінавацілі ў «прапагандзе педафіліі»

У Маскве на фонд Wikimedia Foundation, які падтрымлівае «Вікіпедыю», склалі пратакол аб нібыта «прапагандзе педафіліі». Пра гэта паведаміла «Медыязона», якая заўважыла справу ў базе Таганскага раённага суда.

Пакуль прычыны складання пратаколу не агучаныя, а дата судовага разгляду яшчэ не прызначана.

Раней Wikimedia Foundation неаднаразова штрафавалі ў Расіі за адмову выдаліць матэрыялы, якія ўлады называлі няпраўдай пра «спецыяльную ваенную аперацыю» (такім эўфемізмам расійскія ўлады і прапагандысты называюць развязаную Крамлём вайну ва Украіне) — напрыклад, артыкулы пра акупацыю Херсонскай вобласці ці баі ў Сумскай вобласці. Таксама штрафы прызначаліся за нявыдаленне тэкстаў песень гурта «Псіхея» і артыкулаў пра зачэпінг (экстрэмальны від язды на грамадскім транспарце).

Апошні буйны штраф — 4 мільёны расійскіх рублёў (каля 45 тысяч даляраў)— фонд атрымаў у жніўні 2024 года.

Пасля пачатку поўнамаштабнай вайны супраць Украіны Раскамнагляд пачаў сістэмна крытыкаваць «Вікіпедыю», сцвярджаючы, што яна нібыта «атакуе расіян» і «падае антырасійскую інтэрпрэтацыю падзей».

У снежні 2023 года быў закрыты праект «Викимедиа РУ», які падтрымліваў рускамоўную версію «Вікіпедыі». А праз некалькі месяцаў былы дырэктар праекта Станіслаў Казлоўскі быў уключаны Мінюстам РФ у спіс «замежных агентаў».

Каментары да артыкула