U Rasii Vikipiedyju abvinavacili ŭ «prapahandzie piedafilii»

U Maskvie na fond Wikimedia Foundation, jaki padtrymlivaje «Vikipiedyju», skłali pratakoł ab nibyta «prapahandzie piedafilii». Pra heta paviedamiła «Miedyjazona», jakaja zaŭvažyła spravu ŭ bazie Tahanskaha rajonnaha suda.

Pakul pryčyny składańnia pratakołu nie ahučanyja, a data sudovaha razhladu jašče nie pryznačana.

Raniej Wikimedia Foundation nieadnarazova štrafavali ŭ Rasii za admovu vydalić materyjały, jakija ŭłady nazyvali niapraŭdaj pra «śpiecyjalnuju vajennuju apieracyju» (takim eŭfiemizmam rasijskija ŭłady i prapahandysty nazyvajuć raźviazanuju Kramlom vajnu va Ukrainie) — naprykład, artykuły pra akupacyju Chiersonskaj vobłaści ci bai ŭ Sumskaj vobłaści. Taksama štrafy pryznačalisia za niavydaleńnie tekstaŭ piesień hurta «Psichieja» i artykułaŭ pra začepinh (ekstremalny vid jazdy na hramadskim transparcie).

Apošni bujny štraf — 4 miljony rasijskich rubloŭ (kala 45 tysiač dalaraŭ)— fond atrymaŭ u žniŭni 2024 hoda.

Paśla pačatku poŭnamaštabnaj vajny suprać Ukrainy Raskamnahlad pačaŭ sistemna krytykavać «Vikipiedyju», śćviardžajučy, što jana nibyta «atakuje rasijan» i «padaje antyrasijskuju interpretacyju padziej».

U śniežni 2023 hoda byŭ zakryty prajekt «Vikimiedia RU», jaki padtrymlivaŭ ruskamoŭnuju viersiju «Vikipiedyi». A praź niekalki miesiacaŭ były dyrektar prajekta Stanisłaŭ Kazłoŭski byŭ uklučany Miniustam RF u śpis «zamiežnych ahientaŭ».

Kamientary da artykuła