Лукашэнка прыгразіў ураду адказнасцю за «свавольствы» з цэнамі
14 ліпеня падчас сустрэчы з дэлегацыяй Санкт-Пецярбурга на чале з губернатарам Аляксандрам Бягловым Аляксандр Лукашэнка заявіў, што збіраецца патрабаваць ад свайго ўрада тлумачэнні за «свавольствы» ў пытанні справядлівага фарміравання цэн.
Аляксандр Лукашэнка. Фота: Contributor Getty Image
Лукашэнка заявіў, што ў Беларусі не адмаўляюцца ад дзяржаўнага рэгулявання, хоць, маўляў, напрамую ў цэны не ўмешваюцца. Улады нібыта спрабуюць не столькі рэгуляваць цэны, колькі ўсталёўваць справядлівыя правілы.
Аднак пасля апошніх выбараў, як адзначыў Лукашэнка, у гэтай сферы пачаліся пэўныя «свавольствы», на што скардзяцца людзі. Прэс-служба ўсё фіксуе і перадае яму, таму, як сказаў палітык, чыноўнікам варта рыхтавацца да дакладаў па «цане справядлівасці».
Лукашэнка таксама адзначыў, што справядлівасць у гандлі — гэта не толькі цэны, але і заробкі. На яго думку, несправядліва, калі адзін чалавек атрымлівае дзясяткі тысяч даляраў, а просты прадавец ці касір — толькі некалькі соцень рублёў.
Сапраўднае рэгуляванне, паводле слоў Лукашэнкі — гэта калі ўсе ўдзельнікі ланцужка задаволеныя, а тыя, хто не дацягвае да патрэбнага ўзроўню рэнтабельнасці, павінны працаваць над зніжэннем сабекошту, а не завышаць цэны дзеля ўласнай выгады.
Чытайце таксама:
Лукашэнка праверыў фізпадрыхтоўку генералаў. «Усе паказалі толькі выдатныя вынікі»
Былы прэзідэнт Малдовы марыць пасля выбараў аднавіць адносіны з Лукашэнкам