Знялі забарону на камандныя выступленні беларускіх гімнастаў і акрабатаў
Міжнародная федэрацыя гімнастыкі (FIG) дазволіла беларускім спартсменам выступаць не толькі ў індывідуальных, але і ў групавых і камандных міжнародных спаборніцтвах.
Двухразовы алімпійскі чэмпіён у скачках на батуце Іван Літвіновіч
Цяпер, напрыклад, у скачках на батуце беларусы змогуць прэтэндаваць на медалі ў сінхронных і змешаных сінхронных скачках. Гэта асабліва для іх важна напярэдадні чэмпіянату свету, які пройдзе ў іспанскай Памплоне ў лістападзе.
Галоўная трэнерка зборнай Беларусі па спартыўнай акрабатыцы Анжэла Янусік адзначыла, што вяртанне на міжнародную сцэну выклікала ў спартсменаў і трэнераў моцныя эмоцыі і радасць, бо яны доўга гэтага чакалі.
Раней FIG дазваляла беларускім і расійскім спартсменам выступаць толькі ў індывідуальным нейтральным статусе. У лістападзе 2023 года былі ўведзеныя правілы допуску беларускіх і расійскіх атлетаў да спаборніцтваў пад эгідай FIG.
Міжнародная федэрацыя гімнастыкі ўключае ў сябе сем відаў гімнастыкі: мужчынскую і жаночую спартыўную гімнастыку, мастацкую гімнастыку, спартыўную аэробіку, спартыўную акрабатыку, скачкі на батуце і паркур.