На аўкцыёне ў Францыі прадалі ношаную шкарпэтку Майкла Джэксана

На аўкцыёне ў Францыі была прададзеная шкарпэтка, якую Майкл Джэксан насіў падчас канцэрта ў Ніцы ў 1997 годзе ў рамках ягонага сусветнага тура HIStory.

Майкл Джэксан. Фота: Alan Greth / AP

Гэтая шкарпэтка, аздобленая крышталікамі і добра бачная падчас «месячнай паходкі» пад песні Billie Jean і Beat It, прадалася за 6200 еўра. Яе знайшоў адзін з працаўнікоў сцэны пасля канцэрта на стадыёне «Шарль Эрман».

Спачатку, калі рэч спрабавалі прадаць 21 ліпеня, яе ніхто не купіў з-за слабой рэкламы. Але пасля з’явіліся ахвотныя, і 30 ліпеня шкарпэтку зноў выставілі на аўкцыён, пачаўшы з 2500 еўра.

Гэта не першы выпадак, калі рэчы Майкла Джэксана прадаюцца за вялікія грошы: у Парыжы некалькі гадоў таму ягоны капялюш, у якім спявак упершыню паказаў «месячную паходку» ў 1983 годзе, быў прададзены за больш як 77 тысяч еўра. У Лондане ягоная скураная куртка з рэкламы Pepsi пайшла з малатка за 250 тысяч фунтаў. А ў Тэхасе ягоная знакамітая белая пальчатка з крышталікамі Swarovski была прададзеная за 104 тысячы долараў.

Гэтыя рэчы сталі сімваламі творчасці Джэксана і маюць вялікую каштоўнасць для ягоных прыхільнікаў.

Каментары да артыкула