«На мове Расіі мы тут не размаўляем». Суддзя чэмпіянату Украіны так аргументавала жоўтую картку за неспартыўныя паводзіны
У 3-м туры чэмпіянату Украіны сярод жанчын каманда «Колас» з Кавалёўкі Кіеўскай вобласці прымала клуб «Сістэрс» з Адэсы. Паядынак завяршыўся перамогай гасцей з лікам 2:1, але запомніўся матч найперш эмацыйным эпізодам у канцы першага тайма, піша «Трыбуна».
На 42-й хвіліне галоўны арбітр матча Анастасія Раманюк паказала жоўтую картку футбалістцы адэскай каманды Ірыне Майбародзінай за неспартыўныя паводзіны з агрэсіўнымі воклічамі на рускай мове.
У трансляцыі выразна было чуваць тлумачэнне Раманюк галоўнаму трэнеру «Сістэрс» пра прычыну пакарання:
«На мове Расіі мы тут не размаўляем, гэта чэмпіянат Украіны! Жоўтая картка за нязгоду. І папрасіла гульца размаўляць на ўкраінскай мове. Гэта чэмпіянат Украіны», — сказала Раманюк.
Пазіцыю арбітра гледачы на стадыёне сустрэлі апладысментамі.
Чытайце таксама:
Беларусь паднялася на 48-е месца ў клубным рэйтынгу УЕФА
Клуб з чэмпіянату Кіпра абвясціў пра падпісанне беларускага футбаліста