Пяць расійскіх дронаў ляцелі прамым курсам на базу НАТА ў Польшчы
База ў Жэшуве — гэта ключавы хаб ваеннай падтрымкі Украіны.
Фота: AP Photo Evgeniy Maloletka
Пяць расійскіх дронаў, якія заляцелі на тэрыторыю Польшчы ў ноч на 10 верасня, ляцелі прамым курсам у бок базы НАТА ў Жэшуве.
Праз гэтую базу транспартуецца ваенная тэхніка для Украіны. У НАТА лічаць, што гэта была наўмысная акцыя, піша TVP са спасылкай на Die Welt.
У сераду ўвечары адбылася ўнутраная сустрэча НАТО, прысвечаная бяспецы. Выданне, якое спасылаецца на папярэднія высновы польскіх следчых, сцвярджае, што ў ноч з аўторка на сераду пяць расійскіх дронаў знаходзіліся на прамой траекторыі палёту да базы альянса.
У выніку тры дроны былі збітыя галандскімі знішчальнікамі F-35, а два іншыя разбіліся незразумелым чынам.
«У цяперашняй сітуацыі мы мяркуем, што дроны, хутчэй за ўсё, наўмысна ўварваліся ў паветраную прастору НАТА», — сказаў выданню высокапастаўлены афіцэр НАТА.
Ён падкрэсліў, што з поўначы з аўторка на сераду да прыблізна 6.30 у паветраную прастору Польшчы, якая таксама з’яўляецца тэрыторыяй НАТА, уварвалася агулам ад 22 да 25 дронаў.
«Ужо сама вялікая колькасць дронаў робіць выпадковасць малаверагоднай», — адзначыў прадстаўнік НАТА.
Паводле Die Welt, уварванне расійскіх дронаў у Польшчу — гэта «найбуйнейшы інцыдэнт, датычны бяспекі НАТА, за дзесяцігоддзі».
Чытайце таксама:
Ніхто пакуль не зразумеў, што сказаў Трамп пра залёт расійскіх дронаў у Польшчу
Туск: Значная частка расійскіх дронаў прыляцела ў Польшчу з Беларусі
У Польшчу заляцелі больш за два дзясяткі расійскіх дронаў, а не 10
Дрон упаў на жылы дом у Польшчы
«Гэта акт вайны»: кангрэсмен ЗША заявіў, што Расія атакавала НАТА