На Тайвані валанцёр музея знішчыў твор сучаснага мастацтва, працёршы люстэрка ад пылу
Інцыдэнт адбыўся ў Музеі мастацтваў у горадзе Цзілун, дзе была выстаўлена праца тайваньскага мастака Чэнь Сунчжы пад назвай «Інверсія сэнсу — 16». Гэта інсталяцыя ўяўляла сабой люстэрка, пакрытае шматгадовым пластом пылу, замацаванае на драўлянай дошцы, з плямай пасярэдзіне, якая сімвалізавала «культурную свядомасць сярэдняга класа».
Твор мастацтва да (злева) і пасля (справа) працы валанцёра
Валанцёр падумаў, што люстэрка проста запэцканае, і вырашыў «прыбраць» яго — сцёр пыл туалетнай паперай. У выніку большая частка 40‑гадовага пыльнага пакрыцця была сцёртая, і толькі пасля гэтага супрацоўнікі музея заўважылі, што адбываецца, і паспрабавалі спыніць валанцёра.
Кіраўніцтва музея паведаміла мастаку, што працу, хутчэй за ўсё, нельга аднавіць. Цяпер установа выбачаецца перад аўтарам і разглядае магчымасць выплаты кампенсацыі.
Цікава, што некаторыя крытыкі сцвярджаюць: гэта «выпадковае ўмяшанне» цяпер само па сабе стала часткай твора і адлюстроўвае яго канцэптуальны характар.
Праца «Інверсія сэнсу — 16» уваходзіла ў экспазіцыю «Мы — гэта Я», якая аб’ядноўвала мастацкія аб’екты, зробленыя з будаўнічых матэрыялаў і побытавых рэчаў.
Гэта не першы падобны выпадак: летась механік у Нідэрландах таксама «прыбраў» арт-аб’ект, выкінуўшы дзве бляшанкі з-пад піва, якія былі часткай працы французскага мастака Аляксандра Лавэ «Усе шчаслівыя моманты разам».
Чытайце таксама:
У Нарвегіі з галерэі скралі скульптуру свінні за 15 тысяч даляраў
На аўкцыёне карціну Шагала прадалі за 3 мільёны даляраў
«Шэдэўры Малевіча» з-пад матраца пенсіянеркі. Кур'ёз у свеце мастацтва