Яшчэ адзін еўрапейскі сэрвіс закрывае рахункі беларусам без ДНЖ

Еўрапейскі фінансавы сэрвіс Wise пачаў закрываць рахункі для грамадзян Беларусі і Расіі, якія адкрывалі іх на падставе працоўнай візы тыпу D, паведамляе тэлеграм-канал Infotrans Media Belarus.

Фота ілюстрацыйнае

Карыстальнікі атрымалі паведамленні з патрабаваннем падаць дадатковыя дакументы — дазвол на жыхарства ў любой краіне ЕС.

Раней для адкрыцця карты было дастаткова мець нацыянальную візу D, што давала права жыць і працаваць у Еўропе да года, але цяпер гэтага ўжо недастаткова.

Wise стаў ужо трэцім банкам пасля Paysera і Revolut, які больш не абслугоўвае беларусаў і расіян з працоўнымі візамі. Цяпер, каб адкрыць або захаваць еўрапейскі рахунак, патрабуецца афіцыйны ДНЖ.

Паводле экспертаў, такія меры звязаныя з узмацненнем санкцый супраць Беларусі і Расіі, а таксама страхам банкаў атрымаць штрафы за магчымыя парушэнні санкцыйнага заканадаўства.

Карыстальнікі, якія ўжо маюць карты Wise на падставе візы D, таксама павінны падаць ДНЖ, каб працягваць карыстацца сэрвісам.

Каментары да артыкула