Ціханоўскі ў навагоднім звароце заклікаў да «фінляндызацыі», даравання тым, «каго папутаў бес», і павагі да Трампа

Вызвалены ў 2025 годзе палітвязень Сяргей Ціханоўскі запісаў свой пераднавагодні зварот, у якім выклаў свае думкі адносна тактыкі, якой надалей павінны трымацца беларусы ў сваім змаганні супраць рэжыму Лукашэнкі. 

Сяргей Ціханоўскі. Скрыншот з відэа

У пачатку сваёй крыху больш як чатыроххвіліннай прамовы Сяргей Ціханоўскі выказаў задавальненне, што ўпершыню за 5 гадоў сустракае Новы год у прыемнай атмасферы са сваёй сям'ёй. Для яго тое, што ўдасца вызваліцца менавіта ў адыходзячым годзе, стала прыемнай неспадзяванкай. 

«Ну якія былі шанцы, што дыктатар спатрэбіцца амерыканцам «рашалам» у Крамлі, і мяне аддадуць як буйны хабар у гэтай дзіўнай гульні?» — пытаецца ён і прызнаецца, што з усіх магчымых варыянтаў вызвалення такі для яго стаў самым неверагодным. 

Атрымліваючы асалоду ад свабоды, ён, аднак, не забываецца пра тое, што трэба вызваляць яшчэ не толькі іншых палітвязняў, але і ўсю краіну. І ў гэтым звароце чарговы раз звяртаецца да неаднаразова выказанай ім разам з Вадзімам Пракоп'евым ідэі «фінляндызацыі».

«У разгар новай Халоднай вайны варыянтаў у нас няшмат. Нам, беларусам, выпала жыць на скрыжаванні чужых інтарэсаў, стаць элементам вялікай гульні. І калі адкінуць эмоцыі і добра падумаць, то варыянтаў у Беларусі ўсяго два, трэцяга не дадзена: ці расійская калонія, ці фінскі кампраміс, нейтральная паласа паміж двума блокамі, двума ворагамі ў халоднай вайне. Цяпер гэта здаецца неверагодным, але хутка абодва непрымірымыя бакі будуць зацікаўленыя менавіта ў такім раскладзе», — упэўнены Ціханоўскі.

Любыя альтэрнатыўныя гэтаму погляду думкі ён назваў «дзіцячымі фантазіямі», бо зусім не верыць ні ў тое, што Расію можна перамагчы на полі бою, ні ў тое, што яна зменіцца. 

Закрануў сярод іншага Ціханоўскі і пытанне апошняга вызвалення палітвязняў 13 снежня з вывазам іх ва Украіну. Не называючы імёнаў, ён намякнуў, што словы некаторых вызваленых палітвязняў, прамоўленыя адразу пасля вызвалення, былі няўдалымі і засцярог ад паўтарэння гэтых памылак як іх саміх, так і іншых:

«Вы — нашы героі, вы нам патрэбны. Не спяшайцеся з выхадам на сцэну, не рабіце памылак. Запоўніце спачатку прабелы».

Беларусам жа ён просіць дараваць іх гнеў у інтэрнэце — тыя, маўляў, самі па сабе добрыя, але ж цяпер ім у эміграцыі даводзіцца выжываюць, вось нервы і не вытрымліваюць, таму «гатовыя сарвацца на любым вядомым чалавеку». Таму нічога і не застаецца, як толькі «абняць і дараваць тым, каго папутаў бес». 

На гэтыя самыя эмоцыі ён спісвае і тое, што беларусы не схільныя захапляцца асобай Дональда Трампа:

«Трампа так доўга і шчыра ненавідзяць, што перасталі аналізаваць ягоныя дзеянні. А між тым Дональд Трамп і Марка Рубіа робяць шмат правільных рэчаў. Яны робяць правільныя рэчы на карысць заходняй цывілізацыі, а значыць і Беларусі».

Што ж тычыцца беларускай тактыкі і стратэгіі, то:

«Нам, беларусам, усім разам цяпер і з новымі сіламі належыць спакойна абмеркаваць усе варыянты, дамовіцца і працягнуць наш шлях, шлях да свабоды, да сапраўднай Краіны для жыцця».

«Хай Бог бароніць беларусаў, кожнага з нас. Жыве Беларусь!» — завяршыў сваю прамову Сяргей Ціханоўскі. 

Каментары да артыкула