Іранскія катары хацелі ўзяць на абардаж амерыканскі танкер
Раніцай 3 лютага ў Армузскім праліве шэсць узброеных іранскіх катараў наблізіліся да танкера Stena Imperative, які ішоў пад сцягам ЗША. Паводле крыніц Reuters, маракі з катараў запатрабавалі, каб судна спыніла рух і падрыхтавалася да абардажу, аднак танкер павялічыў хуткасць і працягнуў шлях. Пазней яго суправаджаў амерыканскі вайсковы карабель.
Танкер Stena Imperative. Здымак ілюстрацыйны. Фота: vesselfinder.com
Іранскія ўлады сцвярджаюць, што танкер нібыта зайшоў у тэрытарыяльныя воды Ірана і пакінуў іх пасля папярэджання без інцыдэнтаў, але Reuters адзначае, што судна ў іранскія воды не ўваходзіла.
У той жа дзень амерыканскі знішчальнік F-35 збіў іранскі беспілотнік, які накіроўваўся да авіяносца ЗША Abraham Lincoln у Аравійскім моры, паведамляе Bloomberg. У Цэнтральным камандаванні ЗША заявілі, што гэта было зроблена ў мэтах самаабароны, бо дрон небяспечна збліжаўся з караблём і меў незразумелыя намеры.
На фоне гэтых інцыдэнтаў ЗША і Іран рыхтуюцца да перамоў аб іранскай ядзернай праграме, запланаваных на 6 лютага. Іран прапануе перанесці сустрэчу са Стамбула ў Аман. Раней у Вашынгтоне не выключалі магчымасць вайсковага ўдару па Іране, аднак прэзідэнт ЗША Дональд Трамп заявіў, што з Тэгеранам ідуць сур’ёзныя перамовы і далейшыя рашэнні будуць залежаць ад іх вынікаў.
Чытайце таксама:
Абараніць Ізраіль і арабскіх саюзнікаў. ЗША не ўдараць па Іране, пакуль не залатаюць дзіркі ў СПА
Трамп сцягнуў да берагоў Ірана магутную армаду, і цяпер вырашае, што з ёю рабіць
Саудаўская Аравія непублічна падтрымала магчымы ўдар ЗША па Іране
«Час заканчваецца». Трамп пагражае Ірану новымі ўдарамі
Трамп выставіў Ірану ультыматум на фоне набліжэння да яго берагоў «вялізнай армады»