За 5 гадоў у Беларусі адрамантуюць 500 мастоў
У Беларусі ў найбліжэйшыя пяць гадоў плануюць абнавіць каля 500 мастоў і пуцеправодаў. Пра гэта паведамілі ў Міністэрстве транспарту і камунікацый.
Здымак ілюстрацыйны
Работы правядуць у рамках дзяржаўнай праграмы «Дарогі Беларусі», разлічанай да 2030 года. На яе рэалізацыю прадугледжана каля 19 мільярдаў рублёў. Праграма ўключае рамонт і рэканструкцыю 25 тысяч кіламетраў аўтамабільных дарог — гэта прыкладна ў паўтара раза больш, чым было зроблена ў папярэднюю пяцігодку.
Па словах намесніка начальніка галоўнага ўпраўлення аўтамабільных дарог Мінтранса Сяргея Лявончыка, такая праграма павінна стаць добрай асновай для мадэрнізацыі дарожнай сеткі краіны.
Сярод буйных праектаў — рэканструкцыя выездаў з Мінска ў межах другой кальцавой дарогі, а таксама працяг рэканструкцыі трасы М3, якая злучае сталіцу з Віцебскам.
Усяго ў Беларусі налічваецца больш за 5 тысяч мастоў і пуцеправодаў: каля 2,3 тысячы знаходзяцца на рэспубліканскіх дарогах, амаль 3 тысячы — на мясцовых. Прыкладна 500 з іх плануюць абнавіць у найбліжэйшыя гады.
Акрамя таго, цяпер у краіне ідзе падрыхтоўка дарог да цёплага сезона: наносяць разметку і ліквідуюць дэфекты пакрыцця.
Чытайце таксама:
У Магілёве з'явіўся «мост імя Героя Савецкага Саюза М.І. Яшына». Назва тройчы парушае заканадаўства