Трамп заявіў, што Іран у калапсе і просіць яго адкрыць Армузскі праліў
Прэзідэнт ЗША Дональд Трамп заявіў, што Іран нібыта знаходзіцца ў стане «калапсу» і сам звярнуўся да ЗША з просьбай адкрыць Армузскі праліў. Па словах Трампа, Тэгеран хоча як мага хутчэй аднавіць рух праз праліў, а пакуль спрабуе вырашыць унутраныя праблемы з кіраўніцтвам краіны.
Дональд Трамп. Фота: AP Photo / Alex Brandon
«Іран толькі што паведаміў нам, што знаходзіцца ў «стане калапсу» (State of Collapse). Яны хочуць, каб мы як мага хутчэй «адкрылі Армузскі праліў», пакуль яны спрабуюць разабрацца з сітуацыяй з кіраўніцтвам (і я веру, што ім гэта ўдасца!)» — напісаў Дональд Трамп у сваёй сацыяльнай сетцы Truth Social.
Раней паведамлялася, што перамовы паміж ЗША і Іранам адносна ядзернай здзелкі зайшлі ў тупік. Амерыканскі бок не задаволіў прапанаваны Тэгеранам план, бо той не закранае пытанне іранскай ядзернай праграмы.
Іран прапануе весці перамовы ў тры этапы. Спачатку — спыненне вайны і гарантыі бяспекі для Ірана і Лівана, затым пытанне Армузскага праліва, і толькі пасля гэтага — ядзерная праграма. Да вырашэння першых двух пунктаў Тэгеран адмовіўся абмяркоўваць ядзернае пытанне. На фоне рознагалоссяў перамовы паміж бакамі фактычна прыпыніліся.
Тым часам кіраўнік МЗС Ірана Абас Арагчы ў апошнія дні наведваў Пакістан і Аман, а пасля прыбыў у Санкт-Пецярбург, дзе сустрэўся з прэзідэнтам Расіі Уладзімірам Пуціным.
Чытайце таксама:
Трамп выказаў незадавальненне прапановай Ірана па завяршэнні вайны
Мерц: У ЗША няма стратэгіі ў вайне супраць Ірана, а Іран дзейнічае майстэрна
Іран прапанаваў ЗША адкрыць Армузскі праліў і скончыць вайну
Трамп прадказаў, што іранскія нафтаправоды ўзарвуцца з-за спынення прапампоўкі
Уіткаф і Кушнер да Ісламабада не даехалі. Трамп растлумачыў чаму